ബെറ്റിസിനോട് തോറ്റ് ഒന്നാം സ്ഥാനം കൈവിട്ട് റയൽ മാഡ്രിഡ്‌

എൽ ക്ലാസിക്കോയിൽ പുറത്തെടുത്ത മികവ് ആവർത്തിക്കാനാവാതെ റയൽ കുഴങ്ങിയപ്പോൾ ബെറ്റിസിന് മുൻപിൽ തോൽവി പിണഞ്ഞ് റയൽ മാഡ്രിഡ്‌. ഇന്നലെ ലാലിഗയിൽ നടന്ന ഇരുപത്തിയേഴാം റൗണ്ട് പോരാട്ടത്തിലാണ് റയൽ മാഡ്രിഡ്‌ തോൽവി രുചിച്ചത്. 2-1 നായിരുന്നു ബെറ്റിസിന്റെ മൈതാനത്ത് സന്ദർശകർ തലകുനിച്ചു മടങ്ങിയത്. തോൽവിയോടെ ബാഴ്‌സയെ പിന്തള്ളി ഒന്നാം സ്ഥാനം നേടാനുള്ള റയലിന്റെ അവസരവും പാഴാവുകയായിരുന്നു.

ആദ്യപകുതിയിൽ നാല്പതാം മിനുട്ടിൽ ബെറ്റിസാണ് ലീഡ് നേടിയത്. നെബിൽ ഫകിറിന്റെ അസിസ്റ്റിൽ നിന്ന് സിഡ്‌നിയാണ് റയൽ വലകുലുക്കിയത്. എന്നാൽ ആദ്യപകുതി അവസാനിക്കാൻ നിമിഷങ്ങൾ മാത്രം ശേഷിക്കെ കരിം ബെൻസീമ പെനാൽറ്റിയിലൂടെ റയലിനെ ഒപ്പമെത്തിച്ചു.

രണ്ടാം പകുതിയിൽ 82-ആം മിനുട്ടിലാണ് ബെറ്റിസ്‌ വിജയഗോൾ നേടിയത്. റയൽ താരം ബെൻസീമയുടെ മിസ്സ്‌പാസ്സ് പിടിച്ചെടുത്ത ബെറ്റിസ്‌ താരങ്ങൾ ഒരു കൗണ്ടറിലൂടെ ഗോൾ നേടുകയായിരുന്നു. ക്രിസ്ത്യൻ ടെല്ലോയാണ് ആ ഗോൾ നേടിയത്. തോൽവിയോടെ 56 പോയിന്റുമായി രണ്ടാം സ്ഥാനത്ത് തുടരുകയാണ് റയൽ