ബ്രസീലിയൻ താരത്തെ റയൽ മാഡ്രിഡ്‌ കൈവിട്ടേക്കും, ചേക്കേറുന്നത് ബൊറൂസിയ ഡോർട്മുണ്ടിലേക്ക് !

റയൽ മാഡ്രിഡിന്റെ ബ്രസീലിയൻ താരം റെയ്‌നീർ ജീസസ് ഈ ട്രാൻസ്ഫർ ജാലകത്തിൽ റയൽ വിട്ടേക്കും. ലോണടിസ്ഥാനത്തിലാണ് താരം ജർമ്മൻ വമ്പൻമാരായ ബൊറൂസിയ ഡോർട്മുണ്ടിലേക്ക് കൂടുമാറുക. റയലും ബൊറൂസിയയും കരാറിന്റെ തൊട്ടരികിലെത്തി എന്നാണ് റിപ്പോർട്ടുകൾ.പതിനെട്ടുകാരനായ താരം രണ്ട് വർഷത്തെ ലോണിൽ പോവാനാണ് സാധ്യതകൾ. മുൻപ് റയൽ താരം അഷ്‌റഫ്‌ ഹാക്കിമി രണ്ട് വർഷം ലോണിൽ ബൊറൂസിയയിൽ കളിച്ചിരുന്നു. എന്നാൽ ഈ ട്രാൻസ്ഫർ ജാലകത്തിൽ താരം ഇന്റർമിലാനിലേക്ക് സ്ഥിരമായി കൂടുമാറുകയായിരുന്നു. നിലവിൽ റയൽ മാഡ്രിഡും ഡോർട്മുണ്ടും നല്ല ബന്ധത്തിലാണ് എന്നുള്ളത് കാര്യങ്ങൾ എളുപ്പമാക്കിയേക്കും.

യുവതാരങ്ങൾക്ക് ഏറ്റവും കൂടുതൽ അവസരം നൽകുന്ന ക്ലബാണ് ബൊറൂസിയ. കഴിഞ്ഞ തവണ ഹാക്കിമിക്ക് അവസരങ്ങൾ ലഭിക്കുകയും മുതെലെടുക്കുകയും ചെയ്തിരുന്നു. അത്പോലെ റെയ്നീറിനും ലഭിക്കുമെന്നാണ് റയൽ പ്രതീക്ഷിക്കുന്നത്. ചാമ്പ്യൻസ് ലീഗിൽ അടക്കം താരത്തിന് അവസരം ലഭിക്കുമെന്ന കണക്കുകൂട്ടലിലാണ് റയൽ. ബയേർ ലെവർകൂസൻ, റയൽ വല്ലഡോലിഡ്, റയൽ സോസിഡാഡ് എന്നിവരെ മറികടന്നാണ് ബൊറൂസിയ സ്വന്തമാക്കാനൊരുങ്ങുന്നത്. കഴിഞ്ഞ ജനുവരിയിൽ 30 മില്യൺ യുറോ മുടക്കിയാണ് ഫ്ലെമെങ്കോയിൽ നിന്നും താരത്തെ റയലിൽ എത്തിച്ചത്.