മറ്റുള്ളവരേക്കാൾ മുമ്പേ കളി എങ്ങനെയെന്ന് മെസ്സി കാണുന്നു! മെസ്സിയുടെ മാന്ത്രികത പെഡ്രിയുടെ വാക്കുകളിൽ…..

ലയണൽ മെസ്സിയെന്ന ഫുട്ബോൾ ഇതിഹാസത്തെക്കുറിച്ച് ബാഴ്സലോണയുടെ യുവ മിഡ്ഫീൽഡർ പെഡ്രി പങ്കുവെച്ച വാക്കുകൾ ഇപ്പോൾ കായികലോകത്ത് ഏറെ ശ്രദ്ധേയമാവുകയാണ്. 2020-21 സീസണിൽ ബാഴ്സലോണയിൽ മെസ്സിയോടൊപ്പം കളിക്കാൻ കഴിഞ്ഞത് വലിയൊരു ഭാഗ്യമായി കരുതുന്ന പെഡ്രി, മെസ്സിയുടെ കളിക്കളത്തിലെ അസാധാരണമായ ഉൾക്കാഴ്ചയെയാണ് പ്രശംസിച്ചത്.

“അദ്ദേഹത്തോടൊപ്പം കളിക്കാനും പരിശീലിക്കാനും കഴിഞ്ഞത് എന്റെ ഭാഗ്യമാണ്. ഞാൻ അത് ഒരുപാട് ആസ്വദിക്കുകയും അദ്ദേഹത്തിൽ നിന്ന് ഒട്ടനവധി കാര്യങ്ങൾ പഠിക്കുകയും ചെയ്തു,” പെഡ്രി പറയുന്നു.ഒരു സാധാരണ കളിക്കാരനിൽ നിന്നും മെസ്സിയെ വ്യത്യസ്തനാക്കുന്നത് എന്താണെന്ന് പെഡ്രി വ്യക്തമാക്കുന്നത് ഇങ്ങനെയാണ്:

​”പലപ്പോഴും നമ്മൾ ടെലിവിഷനിൽ കളി കാണുമ്പോൾ ശ്രദ്ധിച്ചാൽ മനസ്സിലാകും, അദ്ദേഹം എപ്പോഴും കളിക്കളത്തിലെ free spaces എവിടെയാണെന്നാണ് നോക്കുന്നത്. എവിടെ നിന്നാൽ പന്ത് സ്വതന്ത്രമായി സ്വീകരിക്കാം എന്ന് അദ്ദേഹത്തിന് കൃത്യമായ ധാരണയുണ്ട്. കളിയിലെ മികവിന്റെ കാര്യത്തിൽ അദ്ദേഹം മറ്റെല്ലാവരേക്കാളും വളരെ മുന്നിലാണ്. മറ്റുള്ളവർ കാണുന്നതിന് ഒരു നിമിഷം മുമ്പ് തന്നെ മെസ്സി കളി കാണുന്നു (പ്രവചിക്കുന്നു). ഗോൾ അടിക്കാൻ എവിടെ നിൽക്കണമെന്ന് അദ്ദേഹത്തിന് കൃത്യമായി അറിയാം.”
​മുപ്പതുകളുടെ അവസാനത്തിലും മെസ്സി പുലർത്തുന്ന ഈ അസാധാരണ ഫോമിനെ അത്ഭുതത്തോടെയാണ് യുവതാരം നോക്കിക്കാണുന്നത്. ഈ പ്രായത്തിലും അദ്ദേഹം ചെയ്യുന്ന കാര്യങ്ങൾ ലയണൽ മെസ്സിക്ക് മാത്രം സാധ്യമാകുന്ന ഒന്നാണെന്നും പെഡ്രി കൂട്ടിച്ചേർത്തു. ഡിസ്പോർട്സ് റിപ്പോർട്ട് ചെയ്ത ഈ വാക്കുകൾ, മെസ്സിയുടെ ഫുട്ബോൾ ബുദ്ധിയും പ്രതിഭയും എത്രത്തോളം അപാരമാണെന്ന് ഒരിക്കൽ കൂടി തെളിയിക്കുന്നു.