അർജന്റീനയെ നേരിടാൻ അൾജീരിയൻ കോച്ച് ! മെസ്സിയെ പൂട്ടാൻ പ്രത്യേക പ്ലാനുണ്ടോ?

 


     2026 ലോകകപ്പിലെ തങ്ങളുടെ ആദ്യ മത്സരത്തിൽ അർജന്റീനയെ നേരിടാനൊരുങ്ങുന്ന അൾജീരിയൻ ടീമിന്റെ പരിശീലകൻ വ്ലാഡിമിർ പെട്കോവിച്ച് കടുത്ത ആത്മവിശ്വാസത്തിലാണ്. ആരാധകർ ആകാംഷയോടെ കാത്തിരുന്ന ഒരു ചോദ്യത്തിനാണ് അദ്ദേഹം ഇപ്പോൾ വ്യക്തമായ മറുപടി നൽകിയിരിക്കുന്നത്: ലയണൽ മെസ്സിയെ തളയ്ക്കാൻ പ്രത്യേക പ്ലാനുണ്ടോ?
മാധ്യമപ്രവർത്തകരുടെ ഈ ചോദ്യത്തിന് ഇല്ല എന്ന് തന്നെയാണ് പെട്കോവിച്ച് മറുപടി നൽകിയത്. അദ്ദേഹത്തിന്റെ വാക്കുകൾ ഇങ്ങനെയായിരുന്നു:
“ഒരു പ്രത്യേക കളിക്കാരനെ മാത്രം ലക്ഷ്യം വെച്ച് ഞാൻ ഇന്നുവരെ ഒരു പ്ലാനും തയ്യാറാക്കിയിട്ടില്ല, ഇതിലും അതിൽ മാറ്റമുണ്ടാകില്ല. സ്വന്തം ടീമിന്റെ കരുത്തിൽ കളി നിയന്ത്രിക്കാനാണ് ഞാൻ ശ്രമിക്കുന്നത്.”

     കളിക്കാർ പരസ്പരം സഹായിച്ച്, ഒരുമയോടെ കളിക്കേണ്ടത് അർജന്റീന പോലെ ഒരു വമ്പൻ ടീമിനെതിരെ അത്യാവശ്യമാണെന്ന് കോച്ച് ഓർമ്മിപ്പിച്ചു. ലക്ഷ്യം ഗോൾ വഴങ്ങാതിരിക്കുക എന്നതാണ്.
അർജന്റീനയുടെ കുന്തമുനയായ മെസ്സിയെ വ്യക്തിപരമായി മാർക്ക് ചെയ്യുന്നതിനേക്കാൾ, സ്വന്തം ടീമിന്റെ ശൈലിയിൽ കളി മുന്നോട്ട് കൊണ്ടുപോകാനാണ് അദ്ദേഹം താല്പര്യപ്പെടുന്നത്. തങ്ങൾ ഈ മത്സരത്തിൽ പ്രിയപ്പെട്ടവരല്ല എന്ന് സമ്മതിക്കുമ്പോഴും, ഈ ലോകകപ്പിൽ ഇതുവരെ നടന്ന അട്ടിമറികൾ അൾജീരിയക്ക് വലിയ പ്രതീക്ഷ നൽകുന്നുണ്ടെന്ന് അദ്ദേഹം കൂട്ടിച്ചേർത്തു.
അർജന്റീനൻ കോച്ച് ലയണൽ സ്കലോനിയെ പ്രശംസിക്കാനും പെട്കോവിച്ച് മറന്നില്ല. എന്തായാലും പ്രതിരോധ പൂട്ടിനേക്കാൾ, സ്വന്തം ശൈലിയിലുള്ള ആക്രമണത്തിലൂടെ അർജന്റീനയെ വീഴ്ത്താനാണ് അൾജീരിയൻ കോച്ചിന്റെ ഭാവം.