സാവിഞ്ഞോയുടെ തകർപ്പൻ പ്രകടനം,റിയാദ് മഹ്റസ് പ്രതികരിച്ചത് കണ്ടോ?

ഈ സമ്മർ ട്രാൻസ്ഫർ ജാലകത്തിലായിരുന്നു ബ്രസീലിയൻ സൂപ്പർ താരമായ സാവിഞ്ഞോയെ മാഞ്ചസ്റ്റർ സിറ്റി സ്വന്തമാക്കിയത്. ഫ്രഞ്ച് ക്ലബ്ബായ ട്രോയസിൽ നിന്നും 21 മില്യൺ പൗണ്ടിനായിരുന്നു താരത്തെ സിറ്റി സ്വന്തമാക്കിയത്. കഴിഞ്ഞ സീസണിൽ ജിറോണക്ക് വേണ്ടി ഗംഭീര പ്രകടനമായിരുന്നു താരം നടത്തിയിരുന്നത്. ഇതോടുകൂടിയാണ് സിറ്റി സാവിഞ്ഞോയെ കൊണ്ടുവരാൻ തീരുമാനിച്ചത്.

കഴിഞ്ഞ ചില ചെൽസിക്കെതിരെയുള്ള മത്സരത്തിൽ വലതു വിങ്ങിൽ ഗംഭീര പ്രകടനമായിരുന്നു താരം നടത്തിയിരുന്നത്. മുമ്പ് ഈ പൊസിഷനിൽ കളിച്ചിരുന്ന അൾജീരിയൻ സൂപ്പർ താരം റിയാദ് മഹ്റസിന്റെ ജേഴ്‌സി നമ്പറായ 26 ആയിരുന്നു സാവിഞ്ഞോയും ധരിച്ചിരുന്നത്. ചെൽസി പ്രതിരോധനിരതാരമായ കുക്കുറെയ്യക്ക് നിരന്തരം തലവേദന സൃഷ്ടിക്കാൻ സാവിഞ്ഞോക്ക് കഴിഞ്ഞിരുന്നു. താരത്തിന്റെ വേഗതയും ഡ്രിബ്ലിങ്ങും ബോൾ കൺട്രോളിങ്ങും ഒക്കെ അസാധാരണമായിരുന്നു.

ഇതിൽ അത്ഭുതം പ്രകടിപ്പിച്ചുകൊണ്ട് റിയാദ് മഹ്റസ് തന്നെ രംഗത്ത് വന്നിട്ടുണ്ട്.സാവിഞ്ഞോയുടെ പ്രകടനത്തിന്റെ വീഡിയോ മാഞ്ചസ്റ്റർ സിറ്റി തങ്ങളുടെ സാമൂഹിക മാധ്യമങ്ങളിൽ പങ്കുവെച്ചിരുന്നു. ഇത് ഷെയർ ചെയ്തു കൊണ്ടാണ് മഹ്റസ് തന്റെ പ്രതികരണം രേഖപ്പെടുത്തിയിട്ടുള്ളത്. ഒരു മിനിറ്റ് നിൽക്കൂ എന്ന് ക്യാപ്ഷനായി കൊണ്ട് എഴുതിയ അദ്ദേഹം സൂക്ഷ്മമായി നിരീക്ഷിക്കുന്നതിന്റെയും ചിരിക്കുന്നതിന്റെയും ഇമോജികൾ പങ്കുവെച്ചിട്ടുണ്ട്. അതായത് സാവിഞ്ഞോ തന്നെത്തന്നെ ഓർമ്മപ്പെടുത്തുന്നു എന്നാണ് മഹ്റസ് ഉദ്ദേശിക്കുന്നത്.

കൂടാതെ മറ്റൊരു കമന്റ് കൂടി അദ്ദേഹം രേഖപ്പെടുത്തിയിട്ടുണ്ട്. പ്രശസ്തമായ ഡബിൾ ഐഡന്റിറ്റി സ്പൈഡർമാന്റെ ഒരു മീമാണ് അദ്ദേഹം പങ്കുവെച്ചിട്ടുള്ളത്. അതായത് തന്നെപ്പോലെ തന്നെയാണ് സാവിഞ്ഞോയും എന്നാണ് അദ്ദേഹത്തിന്റെ അഭിപ്രായം.മഹ്റസിന്റെ യഥാർത്ഥ പിൻഗാമിയാവാൻ സാവിഞ്ഞോക്ക് കഴിയുമെന്ന് ഇപ്പോൾ ആരാധകരും അവകാശപ്പെടുന്നുണ്ട്. നിലവിൽ സൗദി അറേബ്യൻ ക്ലബ്ബായ അൽ അഹ്ലിയുടെ താരമാണ് മഹ്റസ്. മാഞ്ചസ്റ്റർ സിറ്റിക്ക് വേണ്ടി തകർപ്പൻ പ്രകടനം നടത്തുകയും ഒരുപാട് നേട്ടങ്ങൾ സ്വന്തമാക്കുകയും ചെയ്തതിനുശേഷമാണ് അദ്ദേഹം സൗദിയിലേക്ക് പോയത്.