ഇത് പ്രധാനപ്പെട്ട മത്സരമല്ലല്ലോ? തോൽവിയിൽ വിശദീകരണവുമായി ആഞ്ചലോട്ടി!
പ്രീ സീസണിൽ നടന്ന ആദ്യത്തെ സൗഹൃദ മത്സരത്തിൽ റയൽ മാഡ്രിഡിന് തോൽവി ഏറ്റുവാങ്ങേണ്ടി വന്നിരുന്നു. എതിരില്ലാത്ത ഒരു ഗോളിനാണ് റയൽ മാഡ്രിഡിനെ AC മിലാൻ പരാജയപ്പെടുത്തിയത്. ഇന്ന് നടന്ന രണ്ടാമത്തെ സൗഹൃദ മത്സരത്തിലും റയൽ പരാജയപ്പെട്ടു.എൽ ക്ലാസ്സിക്കോ പോരാട്ടത്തിൽ ഒന്നിനെതിരെ രണ്ട് ഗോളുകൾക്കാണ് ബാഴ്സലോണ വിജയിച്ചിട്ടുള്ളത്.പാവോ വിക്ടറിന്റെ ഇരട്ട ഗോളുകളാണ് അവർക്ക് വിജയം സമ്മാനിച്ചിട്ടുള്ളത്.
എന്നാൽ റയൽ മാഡ്രിഡ് ഈ തോൽവി കാര്യമാക്കുന്നില്ല എന്ന് അവരുടെ ഗോൾകീപ്പറായ കോർട്ടുവ പറഞ്ഞിരുന്നു. അതെ അഭിപ്രായം തന്നെയാണ് അവരുടെ പരിശീലകനായ കാർലോ ആഞ്ചലോട്ടിക്കും ഉള്ളത്.ഇത് പ്രധാനപ്പെട്ട മത്സരം ഒന്നുമല്ലല്ലോ എന്നാണ് അദ്ദേഹം പറഞ്ഞിട്ടുള്ളത്. ഒരുപാട് താരങ്ങൾ ഇല്ലാതെയാണ് തങ്ങൾ കളിച്ചതെന്നും ആഞ്ചലോട്ടി പറഞ്ഞിട്ടുണ്ട്.അദ്ദേഹത്തിന്റെ വാക്കുകൾ ഇങ്ങനെയാണ്.
“ഈ തോൽവി ഞങ്ങൾ കാര്യമാക്കുന്നില്ല.കാരണം ഇത് പ്രധാനപ്പെട്ട ഒരു മത്സരം അല്ലല്ലോ.ഒരുപാട് താരങ്ങൾ ഇല്ലാതെയാണ് ഞങ്ങൾ കളിച്ചത്. ഞങ്ങളുടെ ഫിറ്റ്നസ് വീണ്ടെടുക്കാനുള്ള ഒരു മത്സരം മാത്രമായിട്ടാണ് ഇതിനെ കാണുന്നത്.സീസണിന് വേണ്ടി താരങ്ങൾ ഫിറ്റാവുന്നതിനാണ് പ്രീ സീസൺ സംഘടിപ്പിക്കുന്നത്.ഈ മത്സരങ്ങൾ താരങ്ങൾക്ക് സമയം നൽകുന്നു.ഓഗസ്റ്റ് ഏഴാം തീയതിയാണ് ഞങ്ങൾ അടുത്ത മത്സരം കളിക്കുന്നത്. ഇനി അതിലാണ് “ഇതാണ് റയൽ മാഡ്രിഡ് പരിശീലകൻ പറഞ്ഞിട്ടുള്ളത്.
ഓഗസ്റ്റ് ഏഴാം തീയതി നടക്കുന്ന സൗഹൃദ മത്സരത്തിൽ ചെൽസിയാണ് റയൽ മാഡ്രിഡിന്റെ എതിരാളികൾ. അതോടുകൂടി റയലിന്റെ പ്രീ സീസൺ അവസാനിക്കും. പിന്നീട് ഓഗസ്റ്റ് പതിനഞ്ചാം തീയതി യുവേഫ സൂപ്പർ കപ്പ് ഫൈനലിൽ അറ്റലാന്റയെയാണ് റയൽ മാഡ്രിഡ് നേരിടുക.
