സീസൺ തുടങ്ങുമ്പോൾ കാണാം:എൽ ക്ലാസ്സിക്കോ തോൽവിയിൽ പ്രതികരിച്ച് കോർട്ടുവ!
ഇന്ന് നടന്ന പ്രീ സീസൺ സൗഹൃദ മത്സരത്തിൽ റയൽ മാഡ്രിഡിന് തോൽവി ഏറ്റുവാങ്ങേണ്ടി വന്നിരുന്നു.ചിരവൈരികളായ ബാഴ്സലോണയാണ് ഒന്നിനെതിരെ 2 ഗോളുകൾക്ക് റയൽ മാഡ്രിഡിനെ പരാജയപ്പെടുത്തിയിട്ടുള്ളത്.പാവോ വിക്ടർ നേടിയ ഇരട്ട ഗോളുകളാണ് ബാഴ്സലോണക്ക് വിജയം നേടിക്കൊടുത്തത്.റയലിന്റെ ഏക ഗോൾ നേടിയത് അർജന്റൈൻ താരമായ നിക്കോ പാസാണ്.ഈ പ്രീ സീസണിൽ കളിച്ച രണ്ടു മത്സരങ്ങളിലും റയൽ മാഡ്രിഡ് പരാജയപ്പെടുകയാണ് ചെയ്തിട്ടുള്ളത്.
എന്നാൽ എൽ ക്ലാസിക്കോയിലെ ഈ തോൽവി റയൽ ഗോൾകീപ്പറായ തിബൌട് കോർട്ടുവയെ ആശങ്കപ്പെടുത്തുന്നില്ല. സീസൺ തുടങ്ങുമ്പോൾ കാണാം എന്നാണ് കോർട്ടുവ പറഞ്ഞിട്ടുള്ളത്. അതായത് ഈ തോൽവി കാര്യമാക്കുന്നില്ലെന്നും യഥാർത്ഥ മത്സരങ്ങൾ വരുമ്പോൾ റയൽ മാഡ്രിഡ് വിജയങ്ങൾ നേടുമെന്നുമാണ് ഇദ്ദേഹം അവകാശപ്പെടുന്നത്.കോർട്ടുവയുടെ വാക്കുകൾ ഇങ്ങനെയാണ്.
” ബാഴ്സലോണയോട് തോൽക്കുന്നത് ഒരിക്കലും ഞങ്ങൾ ഇഷ്ടപ്പെടാത്ത കാര്യം തന്നെയാണ്. പക്ഷേ ഏറ്റവും പ്രധാനപ്പെട്ടത് സീസണാണ്. കഴിഞ്ഞ വർഷം കാർവ്വഹൽ പറഞ്ഞത് എല്ലാവർക്കും ഓർമ്മയുണ്ടാകും എന്ന് ഞാൻ കരുതുന്നു. യഥാർത്ഥ മത്സരങ്ങൾ വരുമ്പോൾ നമുക്ക് കാണാം “ഇതാണ് റയൽ മാഡ്രിഡ് ഗോൾകീപ്പർ പറഞ്ഞിട്ടുള്ളത്.
കഴിഞ്ഞ വർഷത്തെ പ്രീ സീസൺ മത്സരത്തിൽ റയൽ മാഡ്രിഡിനെ എതിരില്ലാത്ത മൂന്ന് ഗോളുകൾക്ക് പരാജയപ്പെടുത്താൻ ബാഴ്സലോണ കഴിഞ്ഞിരുന്നു. എന്നാൽ സീസൺ തുടങ്ങുമ്പോൾ കളി മാറുമെന്ന് ഈ തോൽവിക്ക് ശേഷം കാർവഹൽ പറഞ്ഞിരുന്നു.തുടർന്ന് സീസണിൽ ആകെ മൂന്ന് മത്സരങ്ങളാണ് രണ്ട് ടീമുകളും തമ്മിൽ കളിച്ചത്. ആ മൂന്ന് മത്സരങ്ങളിലും വിജയം നേടാൻ റയൽ മാഡ്രിഡിന് കഴിഞ്ഞിരുന്നു.
