ബാഴ്സക്കെതിരെ മോശം പ്രകടനവുമായി എൻഡ്രിക്ക്,റയലിന് തോൽവി!
ഇന്ന് നടന്ന പ്രീ സീസൺ സൗഹൃദ മത്സരത്തിൽ റയൽ മാഡ്രിഡിന് തങ്ങളുടെ ചിരവൈരികളായ ബാഴ്സലോണയോട് തോൽവി ഏറ്റുവാങ്ങേണ്ടി വന്നിരുന്നു. ഒന്നിനെതിരെ 2 ഗോളുകൾക്കാണ് ബാഴ്സ റയലിനെ പരാജയപ്പെടുത്തിയത്. ബാഴ്സക്ക് വേണ്ടി പൗ വിക്ടർ ഇരട്ട ഗോളുകൾ നേടുകയായിരുന്നു.റയൽ മാഡ്രിഡിന്റെ ഗോൾ അർജന്റൈൻ താരമായ നിക്കോ പാസായിരുന്നു നേടിയിരുന്നത്.
മത്സരത്തിൽ മികച്ച പ്രകടനമാണ് ബാഴ്സലോണയുടെ യുവതാരങ്ങൾ പുറത്തെടുത്തത്.അതേസമയം റയൽ മാഡ്രിഡ് തുടർച്ചയായ രണ്ടാം തോൽവിയാണ് വഴങ്ങുന്നത്. ആദ്യ മത്സരത്തിൽ അവർ Ac മിലാനോട് പരാജയപ്പെട്ടിരുന്നു. എന്നാൽ മാഞ്ചസ്റ്റർ സിറ്റിയെ പരാജയപ്പെടുത്തിയതിന് പിന്നാലെയാണ് റയൽ മാഡ്രിഡിനെയും ബാഴ്സലോണ പരാജയപ്പെടുത്തിയിട്ടുള്ളത്.
കഴിഞ്ഞ രണ്ട് മത്സരങ്ങളിലും റയൽ മാഡ്രിഡിന് വേണ്ടി സ്റ്റാർട്ട് ചെയ്ത താരമാണ് എൻഡ്രിക്ക്.ആദ്യത്തെ മത്സരത്തിൽ അദ്ദേഹത്തിന് പ്രത്യേകിച്ചൊന്നും ചെയ്യാൻ കഴിഞ്ഞിരുന്നില്ല. ഇന്നത്തെ എൽ ക്ലാസിക്കോ പോരാട്ടത്തിലും അദ്ദേഹം വളരെ പരിതാപകരമായിരുന്നു. വളരെ മോശം പ്രകടനമാണ് എൻഡ്രിക്ക് നടത്തിയത് എന്നുള്ളത് കണക്കുകളിൽ നിന്നും വ്യക്തമാണ്.
മത്സരത്തിന്റെ 68ആം മിനിറ്റ് വരെയാണ് എൻഡ്രിക്ക് കളിച്ചിട്ടുള്ളത്.ഗോളുകളോ അസിസ്റ്റുകളോ നേടാൻ അദ്ദേഹത്തിന് കഴിഞ്ഞിട്ടില്ല.ടാർഗറ്റിലേക്ക് ഒരു ഷോട്ട് പോലും ഉതിർക്കാൻ അദ്ദേഹത്തിന് കഴിഞ്ഞിട്ടില്ല. 3 ഡ്രിബിളുകൾക്കാണ് അദ്ദേഹം മത്സരത്തിൽ ശ്രമിച്ചത്.ആ മൂന്ന് ഡ്രിബിളുകളും പരാജയപ്പെടുകയാണ് ചെയ്തിട്ടുള്ളത്. കേവലം 11 പാസുകൾ മാത്രമാണ് മത്സരത്തിൽ എൻഡ്രിക്ക് നൽകിയിട്ടുള്ളത്.
അതായത് കളിയിൽ യാതൊരുവിധ ഇമ്പാക്ട് ഉണ്ടാക്കാൻ ഇത് താരത്തിന് കഴിഞ്ഞിട്ടില്ല എന്നുള്ളത് വളരെ വ്യക്തമാണ്.എൻഡ്രിക്ക് ഇനിയും ഒരുപാട് വളരേണ്ടതുണ്ട്.പ്രീ സീസണിലെ മോശം പ്രകടനം അദ്ദേഹത്തിന്റെ ആത്മവിശ്വാസത്തെ ബാധിക്കാൻ സാധ്യതയുണ്ട്.വരുന്ന സീസണിൽ പകരക്കാരന്റെ റോളിലാണ് അദ്ദേഹം കളിക്കുക. സ്ട്രൈക്കർ പൊസിഷനിൽ കിലിയൻ എംബപ്പേയായിരിക്കും ഉണ്ടാവുക.
