ലക്ഷ്യം തുടർച്ചയായ മൂന്നാം കിരീടം, യുവന്റസിൽ തുടരുമെന്ന ഉറപ്പ് നൽകി ക്രിസ്റ്റ്യാനോ !

തന്റെ തുടർച്ചയായ മൂന്നാം സിരി എ കിരീടം ലക്ഷ്യം വെച്ച് കൊണ്ട് യുവന്റസിൽ തന്നെ തുടരുമെന്ന് തന്റെ ആരാധകർക്ക് ഉറപ്പ് നൽകി സൂപ്പർ താരം ക്രിസ്റ്റ്യാനോ റൊണാൾഡോ. സിരി എ അവസാനിച്ച ശേഷം കഴിഞ്ഞ ദിവസം ഇട്ട ഇൻസ്റ്റാഗ്രാം പോസ്റ്റിലാണ് അദ്ദേഹം ഇക്കാര്യം അറിയിച്ചത്. എന്റെ മൂന്നാം കിരീടത്തിനായി മുന്നോട്ട് പോവാം എന്ന ക്യാപ്ഷനും വെച്ചാണ് അദ്ദേഹം തന്റെ ചിത്രം പങ്കുവെച്ചത്. തുടർച്ചയായി പത്താം കിരീടവും യുവന്റസിന് നേടികൊടുക്കണമെന്നാണ് ക്രിസ്റ്റ്യാനോ റൊണാൾഡോയും ആഗ്രഹം. രണ്ട് വർഷം മുമ്പ് നൂറ് മില്യൺ യുറോക്കായിരുന്നു ക്രിസ്റ്റ്യാനോ റൊണാൾഡോ റയൽ മാഡ്രിഡിൽ നിന്നും യുവന്റസിലേക്ക് ചേക്കേറിയത്. സിരി എയിൽ എത്തിയ ശേഷവും തിളങ്ങാൻ താരത്തിന് സാധിച്ചിരുന്നു. ആദ്യത്തെ സീസണിൽ ലീഗിൽ 21 ഗോളുകൾ നേടിയ താരം ഈ സീസണിൽ പത്തെണ്ണം കൂടി വർധിപ്പിച്ച് 31ഗോളുകൾ ആക്കുകയായിരുന്നു. സാറിയുമായുള്ള ബന്ധം അത്ര നല്ലതല്ലെന്നും അതിനാൽ തന്നെ ക്രിസ്റ്റ്യാനോ യുവന്റസ് വിടുമെന്നുള്ള ഊഹാപോഹങ്ങൾ അങ്ങിങ്ങായി തലപൊക്കിയിരുന്നു. ഇതോടെ സാറിയും ക്രിസ്റ്റ്യാനോയും എങ്ങും പോവുന്നില്ലെന്ന് യുവന്റസ് ഡയറക്ടർ തറപ്പിച്ചു പറഞ്ഞിരുന്നു. ഇതിന് പുറമെയാണ് ക്രിസ്റ്റ്യാനോ റൊണാൾഡോയും അടുത്ത സീസണിലും താൻ ഇവിടെ കാണുമെന്നു ഉറപ്പ് നൽകിയത്.

ക്രിസ്റ്റ്യാനോ റൊണാൾഡോ ഇൻസ്റ്റാഗ്രാമിൽ പങ്കുവെച്ച കുറിപ്പ് ഇങ്ങനെയായിരുന്നു. “കഴിഞ്ഞ രണ്ട് സിരി എ കിരീടവും തുടർച്ചയായ ഒൻപതാം കിരീടവും നേടിയതിൽ വളരെയധികം സന്തോഷം തോന്നുന്നു. ഇത് വളരെ ലളിതമായി തോന്നുവെങ്കിലും യഥാർത്ഥത്തിൽ അങ്ങനെയല്ല. വർഷങ്ങളോളം നിങ്ങൾ പരിശ്രമിക്കുകയും കഠിനാദ്ധ്യാനം ചെയ്യുകയും ആത്മാർത്ഥ പുലർത്തുകയും ചെയ്താൽ നിങ്ങൾക്ക് നിങ്ങളുടെ ലക്ഷ്യം നേടാൻ സാധിക്കുകയും മുൻപ് നേടിയതിനേക്കാൾ മികച്ചത് നിങ്ങളിലേക്ക് എത്തിച്ചേരുകയും ചെയ്യും. എന്റെ മൂന്നാമത്തേതിനായി നമുക്ക് മുന്നോട്ട് പോവാം “.യുവന്റസ് നിലവിൽ ചാമ്പ്യൻസ് ലീഗിനുള്ള ഒരുക്കത്തിലാണ്.രണ്ടാം പാദ പ്രീക്വാർട്ടറിൽ ലിയോൺ ആണ് യുവന്റസിന്റെ എതിരാളികൾ. ആദ്യപാദത്തിൽ ഒരു ഗോളിന് തോറ്റതിനാൽ വളരെ നിർണായകമാണ് രണ്ടാം പാദം. എന്നാൽ കഴിഞ്ഞ കുറച്ചു മത്സരങ്ങളിലെ യുവന്റസിന്റെ പ്രകടനം വളരെ പരിതാപകരമായിരുന്നു.