ആരാധകരെ ചതിച്ചു, ചാമ്പ്യൻസ് ലീഗിന്റെ മുഖത്തേക്കാണ് എംബപ്പേ തുപ്പിയത്: വൻ വിമർശനവുമായി ക്രിസ്റ്റോഫ് ഡുഗാരി

യുവേഫ ചാമ്പ്യൻസ് ലീഗിൽ നടന്ന ആദ്യപാദ ക്വാർട്ടർ ഫൈനൽ പോരാട്ടത്തിൽ ഫ്രഞ്ച് കരുത്തരായ പിഎസ്ജിക്ക് തോൽവി ഏറ്റുവാങ്ങേണ്ടി വന്നിരുന്നു. എഫ്സി ബാഴ്സലോണ പാർക്ക് ഡെസ് പ്രിൻസസിൽ വെച്ച് കൊണ്ടാണ് പിഎസ്ജിയെ പരാജയപ്പെടുത്തിയത്.രണ്ടിനെതിരെ മൂന്നു ഗോളുകൾക്കായിരുന്നു അവരുടെ വിജയം. ബ്രസീലിയൻ സൂപ്പർ താരമായ റാഫീഞ്ഞയുടെ ഇരട്ട ഗോളുകളാണ് ബാഴ്സലോണക്ക് ഈ ആവേശ വിജയം സമ്മാനിച്ചിട്ടുള്ളത്.

പിഎസ്ജിയുടെ മൈതാനത്ത് നടന്ന മത്സരത്തിൽ സൂപ്പർ താരം കിലിയൻ എംബപ്പേക്ക് തിളങ്ങാൻ കഴിഞ്ഞിരുന്നില്ല. ബാഴ്സലോണ പ്രതിരോധം അദ്ദേഹത്തെ അക്ഷരാർത്ഥത്തിൽ പൂട്ടുകയായിരുന്നു. അതുകൊണ്ടുതന്നെ എംബപ്പേക്ക് വിമർശനങ്ങൾ നൽകേണ്ടി വരുന്നുണ്ട്. ഫ്രഞ്ച് ഫുട്ബോൾ നിരീക്ഷകനായ ക്രിസ്റ്റോഫ് ഡുഗാരി വലിയ വിമർശനങ്ങളാണ് എംബപ്പേക്ക് നേരെ നടത്തിയിട്ടുള്ളത്.അദ്ദേഹത്തിന്റെ വാക്കുകൾ ഇങ്ങനെയാണ്.

” കഴിഞ്ഞ കുറച്ച് ആഴ്ചകളായി എംബപ്പേ നടത്തുന്നത് മോശം പ്രകടനമാണ്.ഞാൻ ആ ഫുട്ബോളറെ ആക്രമിക്കാൻ പോകുന്നില്ല. കാരണം അത് എളുപ്പമുള്ള കാര്യമാണ്.എല്ലാവരും മത്സരം കണ്ടതാണല്ലോ.എംബപ്പേയുടെ മോശം പ്രകടനത്തെ വിമർശിക്കാൻ ഞാൻ ഉദ്ദേശിക്കുന്നില്ല. പക്ഷേ എംബപ്പേ എന്ന വ്യക്തിയെയാണ് ഞാൻ വിമർശിക്കുന്നത്. വളരെ മോശം ആറ്റിട്യൂടാണ് എംബപ്പേ മത്സരത്തിൽ നടത്തിയിട്ടുള്ളത്. അദ്ദേഹം ഉയർന്ന തലത്തിലുള്ള ഒരു താരമാണ്. പക്ഷേ സ്വഭാവം വളരെ മോശമായിരുന്നു.

അദ്ദേഹത്തിന്റെ മത്സരത്തിലെ ആറ്റിറ്റ്യൂഡും പെരുമാറ്റവും ഒരു വലിയ തട്ടിപ്പ് തന്നെയാണ്. ഫുട്ബോളിനോടുള്ള ബഹുമാനം അദ്ദേഹം മത്സരത്തിൽ കാണിച്ചില്ല.സ്വന്തം ആരാധകരെയും സഹതാരങ്ങളെയും ചതിച്ചു.ഇത്രയും കാലം അദ്ദേഹത്തെ സപ്പോർട്ട് ചെയ്ത, അദ്ദേഹത്തെ വിശ്വസിച്ച ആരാധകരെയാണ് അദ്ദേഹം ചതിച്ചത്. ചാമ്പ്യൻസ് ലീഗിന്റെ മുഖത്തേക്കാണ് യഥാർത്ഥത്തിൽ എംബപ്പേ തുപ്പിയത്. അത്രയും മോശം ആറ്റിട്യൂടാണ് അദ്ദേഹം കാണിച്ചത് ” ഇതാണ് ഡുഗാരി പറഞ്ഞിട്ടുള്ളത്.

സ്വന്തം മൈതാനത്ത് പരാജയപ്പെട്ടത് പിഎസ്ജിക്ക് വലിയ തിരിച്ചടി ഏൽപ്പിച്ചിട്ടുണ്ട്. രണ്ടാം പാദത്തിൽ ബാഴ്സലോണയെ അവരുടെ മൈതാനത്ത് വച്ച് പരാജയപ്പെടുത്തുക എന്നത് പിഎസ്ജിയെ സംബന്ധിച്ചിടത്തോളം ബുദ്ധിമുട്ട് തന്നെയായിരിക്കും.