ക്രിസ്റ്റ്യാനോ ഗോളടിച്ചു, യുവന്റസ് കിരീടം ചൂടി !

ക്രിസ്റ്റ്യാനോ റൊണാൾഡോ ഗോൾ നേടിയ മത്സരത്തിൽ യുവന്റസിന് ജയം. എതിരില്ലാത്ത രണ്ട് ഗോളുകൾക്കാണ് സാംപഡോറിയയെ യുവന്റസ് തകർത്തു വിട്ടത്. ഇതോടെ ഈ സീസണിലെ സിരി എ കിരീടം യുവന്റസ് നേടി. തുടർച്ചയായ ഒൻപതാം തവണയാണ് യുവന്റസ് സിരി എ കിരീടം ചൂടുന്നത്. ക്രിസ്റ്റ്യാനോ റൊണാൾഡോ ഫെഡറികോ ബെർണാഡ്ഷി എന്നിവരാണ് യുവന്റസിന് വേണ്ടി ഗോൾ നേടിയത്. ജയത്തോടെ 36 മത്സരങ്ങളിൽ 26 ജയത്തോടെ 83 പോയിന്റാണ് യുവന്റസ് കരസ്ഥമാക്കിയത്. ഇത്രയും മത്സരങ്ങളിൽ നിന്ന് 76 പോയിന്റുള്ള ഇന്റർ ആ രണ്ടാമത്. ഇതോടെ രണ്ട് മത്സരങ്ങൾ ബാക്കി നിൽക്കെ യുവന്റസ് കിരീടമുറപ്പിക്കുകയായിരുന്നു.

മത്സരത്തിന്റെ ആദ്യപകുതിയുടെ അവസാനനിമിഷത്തിലാണ് ക്രിസ്റ്റ്യാനോ റൊണാൾഡോയുടെ ഗോൾ പിറന്നു വീണത്. യുവന്റസിന് അനുകൂലമായി ലഭിച്ച ഫ്രീകിക്ക് പ്യാനിക്ക് ക്രിസ്റ്റ്യാനോക്ക് വെച്ചു നീട്ടുകയായിരുന്നു. തകർപ്പൻ ഷോട്ടിലൂടെ താരം അത് വലയിലെത്തിക്കുകയായിരുന്നു. 67-ആം മിനിറ്റിൽ ക്രിസ്റ്റ്യാനോ റൊണാൾഡോയുടെ ഇടപെടലിലൂടെ യുവന്റസിന് മറ്റൊരു ഗോൾ ലഭിച്ചു. താരത്തിന്റെ ഷോട്ട് സാംപടോറിയ കീപ്പർ തടഞ്ഞുവെങ്കിലും റീബൗണ്ട് ബോൾ ബെർണാഡ്ഷി ഗോൾ ആക്കി മാറ്റുകയായിരുന്നു. 89-ആം മിനിറ്റിൽ സാൻഡ്രോയെ വീഴ്ത്തിയതിന് ലഭിച്ച പെനാൽറ്റി ക്രിസ്റ്റ്യാനോ റൊണാൾഡോ പാഴാക്കിയത് താരത്തിന് തന്നെ തിരിച്ചടിയാവുകയായിരുന്നു.