ടൊണാലിയുടെ പകരക്കാരൻ, അൽ ഹിലാൽ സൂപ്പർതാരത്തെ ലോണിൽ എത്തിക്കാൻ ന്യൂകാസിൽ യുണൈറ്റഡ്!

ന്യൂകാസിൽ യുണൈറ്റഡിന്റെ ഇറ്റാലിയൻ സൂപ്പർതാരമായ സാൻഡ്രോ ടൊണാലിക്ക് കഴിഞ്ഞ ദിവസം ഒരു ശിക്ഷ നടപടി നേരിടേണ്ടി വന്നിരുന്നു. ബെറ്റിംഗ് വിവാദവുമായി ബന്ധപ്പെട്ടു കൊണ്ട് 10 മാസത്തേക്കാണ് അദ്ദേഹത്തെ വിലക്കിയിട്ടുള്ളത്. ഇനി അടുത്ത 10 മാസം കളിക്കാൻ ടൊണാലിക്ക് സാധിക്കില്ല.ന്യൂകാസിൽ യുണൈറ്റഡിനെ സംബന്ധിച്ചിടത്തോളം താരത്തിന്റെ വിലക്ക് വലിയ ഒരു തിരിച്ചടി തന്നെയാണ്.

അതുകൊണ്ടുതന്നെ വളരെ വേഗത്തിൽ ഒരു പകരക്കാരനെ എത്തിക്കാൻ ന്യൂകാസിൽ യുണൈറ്റഡിന് താല്പര്യമുണ്ട്. ഇപ്പോൾ അവർ പരിഗണിക്കുന്നത് അൽ ഹിലാലിന്റെ പോർച്ചുഗീസ് സൂപ്പർതാരമായ റൂബൻ നെവസിനെയാണ്. പ്രമുഖ മാധ്യമമായ ടോക്ക് സ്പോർട്ടാണ് ഇക്കാര്യം റിപ്പോർട്ട് ചെയ്തിരിക്കുന്നത്.

ലോൺ അടിസ്ഥാനത്തിൽ അദ്ദേഹത്തെ എത്തിക്കാനാണ് ന്യൂകാസിൽ യുണൈറ്റഡ് താല്പര്യപ്പെടുന്നത്. സൗദി പബ്ലിക്ക് ഇൻവെസ്റ്റ്മെന്റ് ഫണ്ടാണ് രണ്ട് ടീമിന്റെയും ഉടമസ്ഥർ. അതുകൊണ്ടുതന്നെ കാര്യങ്ങൾ സങ്കീർണ്ണമാവില്ല എന്നാണ് ന്യൂകാസിൽ പ്രതീക്ഷിക്കുന്നത്. എന്നാൽ അൽ ഹിലാൽ മാനേജ്മെന്റിന്റെയും നെവസിന്റെയും ഇക്കാര്യത്തിലെ നിലപാടുകൾ എന്തൊക്കെയാണ് എന്നത് വ്യക്തമല്ല.

കഴിഞ്ഞ സമ്മർ ട്രാൻസ്ഫർ ജാലകത്തിലായിരുന്നു ഈ മധ്യനിരതാരം സൗദി അറേബ്യയിലേക്ക് എത്തിയത്. ഇംഗ്ലീഷ് പ്രീമിയർ ലീഗ് ക്ലബ്ബായ വോൾവ്സിൽ നിന്നായിരുന്നു നെവസിനെ സ്വന്തമാക്കിയിരുന്നത്. അൽ ഹിലാലിന് വേണ്ടി സൗദി അറേബ്യൻ ലീഗിൽ 11 മത്സരങ്ങൾ കളിച്ച താരം ഒരു അസിസ്റ്റ് സ്വന്തമാക്കിയിട്ടുണ്ട്. ഏതായാലും ലോൺ അടിസ്ഥാനത്തിൽ നെവസിനെ എത്തിക്കാൻ കഴിഞ്ഞാൽ ന്യൂകാസിലിന്റെ നിലവിലെ പ്രതിസന്ധിക്ക് ഒരു താൽക്കാലിക പരിഹാരമാകും.