റയലും അൽ ഹിലാലും മാത്രമല്ല,എംബപ്പേയെ നോട്ടമിട്ട് വേറെയും 5 ക്ലബ്ബുകൾ!

സൂപ്പർതാരം കിലിയൻ എംബപ്പേയുടെ ട്രാൻസ്ഫർ വാർത്തകളാണ് ഇപ്പോൾ ഫുട്ബോൾ ലോകത്ത് കത്തിനിൽക്കുന്നത്. കോൺട്രാക്ട് പുതുക്കാൻ തയ്യാറാവാത്തത് കൊണ്ട് അദ്ദേഹത്തെ വിൽക്കാൻ പിഎസ്ജി തീരുമാനിച്ചു കഴിഞ്ഞിട്ടുണ്ട്. അതിന് പിന്നാലെ സൗദി അറേബ്യൻ ക്ലബ്ബായ അൽ ഹിലാൽ ഒരു വേൾഡ് റെക്കോർഡ് ഓഫർ എംബപ്പേക്ക് നൽകുകയും ചെയ്തിട്ടുണ്ട്.പക്ഷേ താരം അത് നിരസിച്ചിട്ടുണ്ട്.

എംബപ്പേയെ സൈൻ ചെയ്യാൻ ഏറ്റവും കൂടുതൽ സാധ്യതയുള്ളത് സ്പാനിഷ് വമ്പൻമാരായ റയൽ മാഡ്രിഡ് തന്നെയാണ്.പക്ഷേ അവർ കാര്യമായ നീക്കങ്ങൾ ഒന്നും ഇതുവരെ നടത്തിയിട്ടില്ല. അതുകൊണ്ടുതന്നെ മറ്റു ക്ലബ്ബുകളുമായി എംബപ്പേയെ ബന്ധപ്പെടുത്തിക്കൊണ്ട് ഒരുപാട് റൂമറുകൾ ഇപ്പോൾ പുറത്തേക്ക് വന്നിട്ടുണ്ട്. റയൽ മാഡ്രിഡ്, അൽ ഹിലാൽ എന്നിവരെ കൂടാതെ വേറെയും അഞ്ചു ക്ലബ്ബുകൾക്ക് എംബപ്പേയെ സ്വന്തമാക്കാൻ താല്പര്യമുണ്ട്. മറ്റു പല മാധ്യമങ്ങളെയും ഉദ്ധരിച്ചുകൊണ്ട് ഗോൾ ഡോട്ട് കോമാണ് ഇക്കാര്യം റിപ്പോർട്ട് ചെയ്തിട്ടുള്ളത്.

ചെൽസി,മാഞ്ചസ്റ്റർ യുണൈറ്റഡ്, എഫ് സി ബാഴ്സലോണ,ടോട്ടൻഹാം, ഇന്റർ മിലാൻ എന്നീ ക്ലബ്ബുകൾക്കാണ് എംബപ്പേയെ സ്വന്തമാക്കാൻ താല്പര്യമുള്ളത്. ഇതിൽ ലോൺ അടിസ്ഥാനത്തിൽ എംബപ്പേയെ എത്തിക്കാനാണ് ഇന്റർ മിലാൻ താല്പര്യപ്പെടുന്നത്. പക്ഷേ എംബപ്പേയെ സ്വന്തമാക്കുക എന്നത് വളരെ സങ്കീർണമായ ഒരു കാര്യമാണ് എന്നത് ഈ ക്ലബ്ബുകൾക്ക് തന്നെ അറിയാം. ഇതിലെ പല ക്ലബ്ബുകളും ഈ റൂമറുകൾ നിഷേധിക്കുകയും ചെയ്തിരുന്നു. റയൽ മാഡ്രിഡിലേക്ക് അല്ലാതെ മറ്റൊരു ക്ലബ്ബിലേക്ക് ചേക്കേറാൻ എംബപ്പേ ഉദ്ദേശിക്കുന്നില്ല എന്ന് തന്നെയാണ് റിപ്പോർട്ടുകൾ ചൂണ്ടിക്കാണിക്കുന്നത്.

ഏതായാലും അധികം വൈകാതെ തന്നെ എംബപ്പേയുടെ കാര്യത്തിൽ ഒരു അന്തിമ തീരുമാനം ഉണ്ടായേക്കും. അദ്ദേഹത്തെ വിൽക്കാൻ തന്നെയാണ് പിഎസ്ജിയുടെ തീരുമാനം. എന്നാൽ ക്ലബ്ബ് വിടാൻ എംബപ്പേ തയ്യാറുമല്ല. ആരായിരിക്കും അന്തിമ വിജയം നേടുക എന്നത് കാത്തിരുന്ന് കാണേണ്ട കാര്യമാണ്.