മാഞ്ചസ്റ്റർ സിറ്റി സൂപ്പർതാരത്തെ സ്വന്തമാക്കണം,220 മില്യൺ ചിലവഴിക്കാൻ തയ്യാറായി അൽ ഹിലാൽ!

സൗദി അറേബ്യൻ ക്ലബ്ബായ അൽ ഹിലാൽ ഫുട്ബോൾ ലോകത്തെ പല വമ്പൻ താരങ്ങൾക്ക് വേണ്ടിയും ശ്രമങ്ങൾ നടത്തിയിരുന്നു. ലയണൽ മെസ്സിക്ക് ഒരു ബില്യൺ യൂറോയുടെ ഓഫറായിരുന്നു അൽ ഹിലാൽ നൽകിയിരുന്നത്. എന്നാൽ മെസ്സി അത് നിരസിച്ചു കൊണ്ട് അമേരിക്കയിലേക്ക് ചേക്കേറി.മറ്റ് സൂപ്പർതാരങ്ങളായ നെയ്മർ ജൂനിയർ,പൗലോ ഡിബാല എന്നിവർക്ക് വേണ്ടി അൽ ഹിലാൽ ശ്രമങ്ങൾ നടത്തിയിരുന്നു.

എന്നാൽ അതൊന്നും ഫലം കാണാതെ പോവുകയായിരുന്നു. ഇപ്പോൾ അൽ ഹിലാലിന്റെ ലക്ഷ്യം മാഞ്ചസ്റ്റർ സിറ്റിയുടെ പോർച്ചുഗീസ് സൂപ്പർ താരമായ ബെർണാഡോ സിൽവയാണ്.അദ്ദേഹത്തിന് വേണ്ടി വലിയ ഒരു തുക തന്നെ മുടക്കാൻ ഇപ്പോൾ ക്ലബ്ബ് തയ്യാറായിക്കഴിഞ്ഞു. റിപ്പോർട്ടുകൾ പ്രകാരം 220 മില്യൺ യൂറോയെന്ന വമ്പൻ തുകയാണ് താരത്തിന് വേണ്ടി ആകെ ഈ സൗദി ക്ലബ്ബ് ചിലവഴിക്കുക.

28 കാരനായ ഈ താരത്തിന് വേണ്ടി ട്രാൻസ്ഫർ ഫീയായി കൊണ്ട് 70 മില്യൻ യൂറോ നൽകാൻ അൽ ഹിലാൽ തയ്യാറാണ്.മാഞ്ചസ്റ്റർ സിറ്റിക്കാണ് ഈ തുക ലഭിക്കുക. മൂന്നുവർഷത്തെ കോൺട്രാക്ട് ആയിരിക്കും താരത്തിന് അൽ ഹിലാൽ വാഗ്ദാനം ചെയ്യുക. ഒരു വർഷത്തെ സാലറിയായി കൊണ്ട് 50 മില്യൻ യൂറോയാണ് ബെർണാഡോ സിൽവക്ക് ലഭിക്കുക. അങ്ങനെ മൂന്നു വർഷത്തേക്ക് 150 മില്യൻ യൂറോ സ്വന്തമാക്കാൻ ഇദ്ദേഹത്തിന് കഴിയും.

അൽ ഹിലാലിന്റെ ഈ വലിയ ഓഫർ ഇപ്പോൾ സിൽവ പരിഗണിക്കുന്നുണ്ട്.പിഎസ്ജി, എഫ്സി ബാഴ്സലോണ എന്നിവർക്ക് ഈ താരത്തെ സ്വന്തമാക്കാൻ താല്പര്യമുണ്ട്. പക്ഷേ സാമ്പത്തിക പ്രയാസങ്ങൾ കാരണം ബാഴ്സക്ക് നിലവിൽ സാധ്യമല്ല. സിൽവ മാഞ്ചസ്റ്റർ സിറ്റി വിടുകയാണെങ്കിൽ ഒന്നുകിൽ പിഎസ്ജിയിലേക്കോ അല്ലെങ്കിൽ അൽ ഹിലാലിലെക്കോ പോവാനാണ് ഇപ്പോൾ സാധ്യതയുള്ളത്.