തുടർ തോൽവികളും ബയേണിനെതിരെയുള്ള മത്സരവും, പുതിയ സന്ദേശവുമായി കിലിയൻ എംബപ്പേ!

ഖത്തർ വേൾഡ് കപ്പിന് ശേഷം പിഎസ്ജി ഒരു ബുദ്ധിമുട്ടേറിയ സമയത്തിലൂടെയാണ് കടന്നുപോയിക്കൊണ്ടിരിക്കുന്നത്. കഴിഞ്ഞ ജനുവരി മാസത്തിൽ രണ്ടു മത്സരങ്ങളിൽ പിഎസ്ജി പരാജയപ്പെട്ടിരുന്നു. മാത്രമല്ല അവസാനമായി കളിച്ച രണ്ടു മത്സരങ്ങളിലും പിഎസ്ജി പരാജയപ്പെടുകയാണ് ചെയ്തിട്ടുള്ളത്.ഒളിമ്പിക് മാഴ്സെ,മോണോക്കോ എന്നിവരായിരുന്നു പിഎസ്ജിയെ പരാജയപ്പെടുത്തിയത്.

ഇനി പിഎസ്ജിക്ക് നേരിടാനുള്ളത് ജർമ്മൻ വമ്പൻമാരായ ബയേൺ മ്യൂണിക്കിനെയാണ്. വരുന്ന പതിനാലാം തീയതി പിഎസ്ജിയുടെ മൈതാനത്ത് വെച്ചാണ് ഈ മത്സരം നടക്കുക. നിലവിലെ ഈ തുടർ പരാജയങ്ങൾ പിഎസ്ജിക്ക് വലിയ ആശങ്ക നൽകുന്നുണ്ട്. കൂടാതെ പരിക്കുകളും ഇപ്പോൾ പിഎസ്ജിക്ക് തലവേദനയാണ് സൃഷ്ടിച്ചുകൊണ്ടിരിക്കുന്നത്.

ഈയൊരു പ്രതിസന്ധിഘട്ടത്തിൽ പിഎസ്ജിയുടെ സൂപ്പർ താരമായ കിലിയൻ എംബപ്പേ തന്റെ സാമൂഹിക മാധ്യമങ്ങളിലൂടെ ഒരു മെസ്സേജ് പങ്കുവെച്ചിട്ടുണ്ട്.പിഎസ്ജിയുടെ ലോഗോയാണ് അദ്ദേഹം പങ്കുവെച്ചിട്ടുള്ളത്.നമുക്ക് ഒരുമിച്ച് ഐക്യത്തോട് കൂടെയും കരുത്തോടു കൂടെയും നിൽക്കാം എന്നാണ് ക്യാപ്ഷൻ ആയിക്കൊണ്ട് കിലിയൻ എംബപ്പേ കുറിച്ചിട്ടുള്ളത്.

പക്ഷേ ആദ്യപാദ മത്സരത്തിൽ കിലിയൻ എംബപ്പേ കളിക്കാനുള്ള സാധ്യത കുറവാണ്. ഇതേക്കുറിച്ച് കഴിഞ്ഞ ദിവസം പിഎസ്ജിയുടെ പരിശീലകനായ ഗാൾട്ടിയറോട് ചോദിക്കപ്പെട്ടിരുന്നു.എംബപ്പേയുടെ കാര്യത്തിൽ റിസ്ക് എടുക്കില്ല എന്നായിരുന്നു അദ്ദേഹം പറഞ്ഞിരുന്നത്. അതേസമയം ലയണൽ മെസ്സി ഈ മത്സരത്തിൽ ഉണ്ടാവും.നാളെയാണ് മെസ്സി ട്രെയിനിങ് പുനരാരംഭിക്കുക.എന്നിരുന്നാലും എംബപ്പേയുടെ അഭാവം പിഎസ്ജിക്ക് ഒരു തിരിച്ചടി തന്നെയാണ്.