ഖത്തറിലേക്ക് നെയ്മർ എത്തുന്നത് ഏറ്റവും കൂടുതൽ ചവിട്ടി മെതിക്കപ്പെട്ട താരമായി!

ഖത്തർ വേൾഡ് കപ്പിലെ പ്രധാനപ്പെട്ട കിരീട ഫേവറേറ്റുകളായ ബ്രസീലിന്റെ ഏറ്റവും വലിയ പ്രതീക്ഷ സൂപ്പർ താരം നെയ്മർ ജൂനിയറാണ്. മികച്ച പ്രകടനമാണ് നെയ്മർ ഈ സീസണിൽ പുറത്തെടുക്കുന്നത്.മികവ് അദ്ദേഹം വേൾഡ് കപ്പിലും തുടരും എന്നാണ് പ്രതീക്ഷിക്കപ്പെടുന്നത്.

എന്നാൽ നെയ്മറെ സംബന്ധിച്ചിടത്തോളം മറ്റൊരു ആശങ്കപ്പെടുത്തുന്ന കണക്ക് കൂടി ഇവിടെയുണ്ട്. അതായത് യൂറോപ്പിലെ ടോപ്പ് ഫൈവ് ലീഗുകളിൽ ഏറ്റവും കൂടുതൽ ഫൗളിന് ഇരയായ താരം നെയ്മർ ജൂനിയറാണ്.20 മത്സരങ്ങളിൽ നിന്ന് 66 ഫൗളുകൾ ആണ് നെയ്മർക്ക് ഏറ്റുവാങ്ങേണ്ടി വന്നിട്ടുള്ളത്. 2018 റഷ്യൻ വേൾഡ് കപ്പിലും ഏറ്റവും കൂടുതൽ ഫൗളുകൾ ഏറ്റുവാങ്ങേണ്ടി വന്നിട്ടുള്ള താരം കൂടിയാണ് നെയ്മർ.

ആകെ അഞ്ച് മത്സരങ്ങൾ കളിച്ച നെയ്മർക്ക് 26 ഫൗളുകൾ വഴങ്ങേണ്ടി വന്നിരുന്നു. ഇത്രയധികം ഫൗളുകൾ ഏൽക്കേണ്ടി വരുമ്പോൾ പരിക്ക് ഭീതി അവിടെ നിലനിൽക്കുന്നുണ്ട്. അതേസമയം മറ്റൊരു ബ്രസീലിയൻ സൂപ്പർതാരമായ വിനീഷ്യസ് ജൂനിയറുടെ കാര്യത്തിലും ആശങ്കകൾ നിലനിൽക്കുന്നുണ്ട്.

ലാലിഗയിൽ ഏറ്റവും കൂടുതൽ ഫൗളുകൾക്ക് ഇരയാക്കപ്പെട്ട താരം വിനീഷ്യസാണ്.60 ഫൗളുകളാണ് അദ്ദേഹത്തിന് ആകെ ഏൽക്കേണ്ടി വന്നിട്ടുള്ളത്.കൂടാതെ ഗബ്രിയേൽ ജീസസ്,ബ്രൂണോ ഗുയ്മിറസ് എന്നിവരും ഏറെ ഫൗളുകൾ ഏറ്റുവാങ്ങേണ്ടി വരുന്ന താരങ്ങളാണ്. ബ്രസീലിനെ സംബന്ധിച്ചിടത്തോളം ഇതൊക്കെ ആശങ്ക ഉണ്ടാക്കുന്ന ഒരു കാര്യം തന്നെയാണ്.