മെസ്സി തന്നെ ഏറ്റവും മികച്ച താരം, അദ്ദേഹം ബാഴ്സയിൽ തിരിച്ചെത്തും : ഇനിയേസ്റ്റ

സൂപ്പർ താരം ലയണൽ മെസ്സി ഈ സീസണിൽ മികച്ച പ്രകടനമാണ് ഇപ്പോൾ പുറത്തെടുക്കുന്നത്. 11 ഗോളുകളും 12 അസിസ്റ്റുകളുമാണ് മെസ്സി ഈ സീസണിൽ ക്ലബ്ബിന് വേണ്ടി നേടിയിട്ടുള്ളത്. പ്രായത്തിന്റെ യാതൊരു അവശതകളും മെസ്സി കളിക്കളത്തിൽ കാണിക്കുന്നില്ല എന്നുള്ളതാണ് യാഥാർത്ഥ്യം.

ഏതായാലും ലയണൽ മെസ്സിയെക്കുറിച്ച് അദ്ദേഹത്തിന്റെ മുൻ സഹതാരമായ ആൻഡ്രസ് ഇനിയേസ്റ്റ ഇപ്പോൾ സംസാരിച്ചിട്ടുണ്ട്.ലോകത്തിലെ ഏറ്റവും മികച്ച താരം ലയണൽ മെസ്സി തന്നെയാണ് എന്നാണ് ഇനിയേസ്റ്റ പറഞ്ഞിട്ടുള്ളത്. മെസ്സിക്ക് ബാഴ്സലോണയിൽ തിരിച്ചെത്താൻ സാധിക്കുമെന്നും അദ്ദേഹം പ്രതീക്ഷ പ്രകടിപ്പിച്ചു.ഇനിയേസ്റ്റ Tyc സ്പോർട്സിനോട് പറഞ്ഞത് ഇങ്ങനെയാണ്.

” ഇപ്പോഴത്തെ ലയണൽ മെസ്സി മുമ്പുള്ളതിൽ നിന്നും വ്യത്യസ്തമാണ്.മെസ്സി തന്നെയാണ് ഇപ്പോഴും നമ്പർ വൺ.മാറ്റം വന്നത് അദ്ദേഹം കൂടുതൽ വളരുകയും ഇംപ്രൂവ് ആവുകയും ചെയ്തു എന്നുള്ള കാര്യത്തിലാണ്. കൂടാതെ അദ്ദേഹം തന്റെ സഹതാരങ്ങളെ കൂടുതൽ മികച്ചതാക്കുകയും ചെയ്യുന്നു. മെസ്സി ഉണ്ടാവുക എന്നുള്ളത് ആ ടീമിനെ വിജയങ്ങൾ നേടുന്നതിലും കിരീടങ്ങൾ കരസ്ഥമാക്കുന്നതിനും പ്രധാനപ്പെട്ട ഒരു കാര്യമാണ്. ലയണൽ മെസ്സി ചെയ്യുന്ന പോലെയുള്ള കാര്യങ്ങൾ ചെയ്യുന്ന ഒരാളെയും ഞാൻ ഇതുവരെ കണ്ടിട്ടില്ല.ബാഴ്സയിലേക്ക് തിരിച്ചെത്തുക എന്നുള്ളത് ഒരിക്കലും എളുപ്പമുള്ള കാര്യമല്ല.പക്ഷേ മെസ്സിക്ക് സാധിക്കുമെന്നാണ് ഞാൻ വിശ്വസിക്കുന്നത് ” ഇനിയേസ്റ്റ പറഞ്ഞു.

മെസ്സിക്കൊപ്പം ദീർഘകാലം ബാഴ്സയിൽ കളിച്ചിട്ടുള്ള താരമാണ് ആൻഡ്രസ് ഇനിയേസ്റ്റ. നിലവിൽ അദ്ദേഹം ജാപ്പനീസ് ക്ലബ്ബായ വിസൽ കോബെയുടെ ഭാഗമാണ്.