മെസ്സി,മറഡോണ എന്നിവരെ പോലെയാണ് ആന്റണി : വിശദീകരിച്ച് വെസ് ബ്രൗൺ

കഴിഞ്ഞ ട്രാൻസ്ഫർ ജാലകത്തിന്റെ ഏറ്റവും അവസാനത്തിലായിരുന്നു ബ്രസീലിയൻ സൂപ്പർതാരമായ  ആന്റണിയെ മാഞ്ചസ്റ്റർ യുണൈറ്റഡ് സ്വന്തമാക്കിയത്. തുടർന്ന് യുണൈറ്റഡിൽ ഒരു മികച്ച തുടക്കം ആന്റണിക്ക് ലഭിക്കുകയും ചെയ്തിരുന്നു. പ്രീമിയർ ലീഗിലെ ആദ്യ മൂന്നു മത്സരങ്ങളിലും ഗോൾ നേടാൻ ആന്റണിക്ക് സാധിച്ചിരുന്നു.

ഇപ്പോഴിതാ ഈ ബ്രസീലിയൻ സൂപ്പർതാരത്തെക്കുറിച്ച് മാഞ്ചസ്റ്റർ യുണൈറ്റഡ് ഇതിഹാസമായ വെസ് ബ്രൗൺ ചില കാര്യങ്ങൾ പറഞ്ഞിട്ടുണ്ട്. ആന്റണിയുടെ ഇടതുകാൽ  മെസ്സിയുടെയും മറഡോണയുടെയും ഇടതു കാലിന് സമാനമാണ് എന്നാണ്  ഇദ്ദേഹം പറഞ്ഞിട്ടുള്ളത്. ഒരുപാട് മികച്ച സ്കില്ലുകൾ ലഭിച്ചിട്ടുള്ള താരമാണ് ആന്റണിയെന്നും വെസ് ബ്രൗൺ കൂട്ടിച്ചേർത്തു.അദ്ദേഹത്തിന്റെ വാക്കുകൾ ഇങ്ങനെയാണ്.

” ആന്റണിയുടെ ഇടതുകാൽ മെസ്സി, മറഡോണ എന്നിവരുടെ ഇടതുകാലിനെ പോലെയാണ്. ആന്റണിയുടെ ഇടതു കാലിന് മികച്ച സ്ക്കില്ലുകൾ ലഭിച്ചിട്ടുണ്ട്. അദ്ദേഹത്തിന് വളരെ പെട്ടെന്ന് ഡ്രിബിൾ ചെയ്യാൻ സാധിക്കും. അദ്ദേഹം ഡ്രിബിൾ ചെയ്യാൻ പോവുകയാണ് എന്നറിഞ്ഞാലും പലർക്കും അദ്ദേഹത്തെ തടയാൻ സാധിക്കാറില്ല. മാത്രമല്ലആര്യൻ റോബനുമായും അദ്ദേഹത്തെ താരതമ്യം ചെയ്യാം. ഇരുവരും തമ്മിൽ സാമ്യതകളുണ്ട്.വളരെ ഷാർപ്പ് ആയിട്ടുള്ള ഒരു താരമാണ് ആന്റണി.എന്താണ് ചെയ്യുന്നത് എന്നുള്ളത് അദ്ദേഹത്തിന് അറിയാം.അദ്ദേഹം വളരെയധികം ആത്മവിശ്വാസം ഉള്ളവനാണ്.പലപ്പോഴും അദ്ദേഹത്തെ മാർക്ക് ചെയ്യാൻ ബുദ്ധിമുട്ടുള്ള കാര്യമാണ് ” വെസ് ബ്രൗൺ പറഞ്ഞു.

കഴിഞ്ഞ ഷെറിഫിനെതിരെയുള്ള മത്സരത്തിൽ ആന്റണി തന്റെ സ്കില്ലുകൾ പുറത്തെടുത്തിരുന്നു. എന്നാൽ താരത്തിന് ഇക്കാര്യത്തിൽ വിമർശനങ്ങൾ ഏൽക്കേണ്ടി വരികയും ചെയ്തിരുന്നു.ആന്റണിയെ തിരുത്തും എന്നുള്ള കാര്യം പരിശീലകനായ ടെൻ ഹാഗ് വ്യക്തമാക്കിയിരുന്നു.