ആന്റണിക്ക് മാഞ്ചസ്റ്റർ യുണൈറ്റഡിന്റെ ഉറപ്പ്!

ഈ ട്രാൻസ്ഫർ ജാലകത്തിൽ ഇനി മാഞ്ചസ്റ്റർ യുണൈറ്റഡിന്റെ ഏറ്റവും വലിയ ലക്ഷ്യം അയാക്സിന്റെ ബ്രസീലിയൻ സൂപ്പർതാരമായ ആന്റണിയെ സ്വന്തമാക്കുക എന്നുള്ളതാണ്. അതിനു വേണ്ടിയുള്ള ശ്രമങ്ങളിലാണ് നിലവിൽ മാഞ്ചസ്റ്റർ യുണൈറ്റഡ് ഉള്ളത്. ട്രാൻസ്ഫർ ജാലകം അടക്കാൻ ഇനി വളരെ കുറഞ്ഞ ദിവസങ്ങൾ മാത്രമാണ് അവശേഷിക്കുന്നത്.

അതുകൊണ്ടുതന്നെ യുണൈറ്റഡ് തങ്ങളുടെ നീക്കങ്ങൾ വേഗത്തിലാക്കിയിട്ടുണ്ട്.ഇപ്പോഴിതാ ആന്റണിയുമായി ബന്ധപ്പെട്ട ഏറ്റവും പുതിയ വിവരങ്ങൾ പ്രമുഖ ഫുട്ബോൾ ജേണലിസ്റ്റായ ഫാബ്രിസിയോ റൊമാനോ പങ്കുവെച്ചിട്ടുണ്ട്.അതായത് മാഞ്ചസ്റ്റർ യുണൈറ്റഡ് ആന്റണിയുടെ ക്യാമ്പിനെ ബന്ധപ്പെട്ട് കഴിഞ്ഞിട്ടുണ്ട്. ഉടൻതന്നെ അയാക്സിന് ഒരു പുതിയ ഓഫർ സമർപ്പിക്കുമെന്നും യുണൈറ്റഡ് ആന്റണിയെ അറിയിച്ചിട്ടുണ്ട്.

മാത്രമല്ല സാധ്യമായ വേഗത്തിൽ എത്രയും പെട്ടെന്ന് ഡീൽ പൂർത്തിയാക്കുമെന്നുള്ള ഉറപ്പും മാഞ്ചസ്റ്റർ യുണൈറ്റഡ് ആന്റണിക്ക് നൽകിയിട്ടുണ്ട്. ആന്റണിയെ സ്വന്തമാക്കാൻ വേണ്ടി ഏതറ്റം വരെയും പോവുക എന്നുള്ളതിനാണ് നിലവിൽ മാഞ്ചസ്റ്റർ യുണൈറ്റഡ് മുൻഗണന നൽകുന്നത്. ആന്റണിയുമായി നേരത്തെ ധാരണയിൽ എത്താൻ യുണൈറ്റഡിന് കഴിഞ്ഞിട്ടുണ്ട്. അഞ്ചുവർഷത്തെ കരാറിലായിരിക്കും താരം ഒപ്പ് വെക്കുക.

അതേസമയം വലിയൊരു തുക ലഭിച്ചാൽ ആന്റണിയെ കൈവിടാൻ അയാക്സ് തയ്യാറായേക്കും.എന്നാൽ അയാക്സിന്റെ പരിശീലകന് താരത്തെ വിട്ടു നൽകാൻ ഒട്ടും താല്പര്യമില്ല. ഇതിനോടകം തന്നെ അഞ്ചോ ആറോ പ്രധാനപ്പെട്ട താരങ്ങളെ തങ്ങൾക്ക് നഷ്ടമായെന്നും അയാക്സ് ആന്റണിയെ നഷ്ടപ്പെടുത്തില്ല എന്നാണ് താൻ വിശ്വസിക്കുന്നതെന്നും അയാക്സ് പരിശീലകനായ ഷ്രൂഡർ അറിയിച്ചിരുന്നു.