ഇനി മുന്നിലുള്ളത് ക്രിസ്റ്റ്യാനോ റൊണാൾഡോ മാത്രം,റൗളിനെയും മറികടന്ന് കൊണ്ട് ബെൻസിമയുടെ അവിസ്മരണീയ കുതിപ്പ്!

ഇന്നലെ യുവേഫ സൂപ്പർ കപ്പിൽ നടന്ന കലാശ പോരാട്ടത്തിൽ ഫ്രാങ്ക്‌ഫർട്ടിനെ പരാജയപ്പെടുത്തിക്കൊണ്ട് കിരീടം നേടാൻ വമ്പൻമാരായ റയൽ മാഡ്രിഡിന് സാധിച്ചിരുന്നു. എതിരില്ലാത്ത രണ്ട് ഗോളുകൾക്കാണ് യൂറോപ്പ ലീഗ് ചാമ്പ്യന്മാരായ ഫ്രാങ്ക്‌ഫർട്ടിനെ ചാമ്പ്യൻസ് ലീഗ് കിരീട ജേതാക്കളായ റയൽ പരാജയപ്പെടുത്തിയത്.

മത്സരത്തിൽ സൂപ്പർതാരം ബെൻസിമ റയലിന് വേണ്ടി ഒരു ഗോൾ കണ്ടെത്തിയിരുന്നു.മത്സരത്തിന്റെ 65-ആം മിനുട്ടിൽ സൂപ്പർ താരം വിനീഷ്യസിന്റെ അസിസ്റ്റിൽ നിന്നാണ് ബെൻസിമ ഗോൾ നേടിയിട്ടുള്ളത്. ഈ ഗോൾ നേട്ടത്തോടുകൂടി റയലിന്റെ ചരിത്ര പുസ്തകത്തിലാണ് ഒരിക്കൽ കൂടി ബെൻസിമ സ്ഥാനം കണ്ടെത്തിയിട്ടുള്ളത്.

ഇതോട് കൂടി റയലിന്റെ ചരിത്രത്തിൽ ക്ലബ്ബിനുവേണ്ടി ഏറ്റവും കൂടുതൽ ഗോളുകൾ നേടുന്ന രണ്ടാമത്തെ താരമായി മാറാൻ ബെൻസിമക്ക് സാധിച്ചിട്ടുണ്ട്.

324 ഗോളുകളാണ് ഇതുവരെ റയലിന് വേണ്ടി ബെൻസിമ നേടിയിട്ടുള്ളത്.323 ഗോളുകൾ നേടിയ ഇതിഹാസ താരം റൗൾ ഗോൺസാലസിനെയാണ് ഗോൾ വേട്ടയുടെ കാര്യത്തിൽ ഫ്രഞ്ച് സൂപ്പർ താരം മറികടന്നിട്ടുള്ളത്. എന്നാൽ ഒന്നാം സ്ഥാനത്തുള്ള ക്രിസ്റ്റ്യാനോ റൊണാൾഡോയെ ഗോളടിയുടെ കാര്യത്തിൽ മറികടക്കണമെങ്കിൽ ബെൻസിമ ഒന്ന് കഷ്ടപ്പെടേണ്ടി വരും.കാരണം 450 ഗോളുകൾ നേടിയ റൊണാൾഡോ ബഹുദൂരം മുന്നിലാണ്.

സൂപ്പർ കപ്പ് കൂടി നേടിയതോടെ ബെൻസിമ തന്റെ ഏറ്റവും മികച്ച സമയത്തിലൂടെയാണ് കടന്നുപോകുന്നത്.ഇനി ബാലൺ ഡി’ഓർ പുരസ്കാരം കൂടി ബെൻസിമക്ക് ലഭിക്കുമെന്നാണ് ആരാധകർ പ്രതീക്ഷിക്കുന്നത്.