മോശം സമയത്തും കൂടെ നിൽക്കുന്നവരാണ് ബാഴ്സ ആരാധകർ,അവരെ മുമ്പുണ്ടായിരുന്നതിനേക്കാൾ കൂടുതൽ ഹാപ്പിയാക്കണം : ലെവന്റോസ്ക്കി!

ഈ സമ്മർ ട്രാൻസ്ഫർ ജാലകത്തിൽ തന്റെ സ്വപ്ന ക്ലബ്ബായ ബാഴ്സയിലേക്ക് എത്താൻ സൂപ്പർ താരം റോബർട്ട് ലെവന്റോസ്ക്കിക്ക് സാധിച്ചിരുന്നു. വമ്പൻമാരായ പിഎസ്ജിയും ചെൽസിയും താരത്തിന് ആകർഷകമായ ഓഫറുകൾ നൽകിയിരുന്നു. എന്നാൽ ഇതെല്ലാം തട്ടിമാറ്റിക്കൊണ്ട് ലെവന്റോസ്ക്കി ബാഴ്സയെ തിരഞ്ഞെടുക്കുകയായിരുന്നു.

ഏതായാലും ബാഴ്സ ആരാധകരെ കുറിച്ച് ലെവന്റോസ്ക്കി ചില കാര്യങ്ങൾ ഇപ്പോൾ പറഞ്ഞിട്ടുണ്ട്. അതായത് നല്ല സമയത്തും മോശം സമയത്തും കൂടെ നിൽക്കുന്നവരാണ് ബാഴ്സ ആരാധകരെന്നും മുമ്പുണ്ടായിരുന്നതിനേക്കാൾ കൂടുതൽ അവരെ തനിക്ക് ഹാപ്പിയാക്കണമെന്നുമാണ് ലെവന്റോസ്ക്കി പറഞ്ഞിട്ടുള്ളത്. അദ്ദേഹത്തിന്റെ വാക്കുകളെ മാർക്ക റിപ്പോർട്ട് ചെയ്യുന്നത് ഇങ്ങനെയാണ്.

“ബാഴ്സ ആരാധകർക്ക് ഒരുപാട് സന്തോഷം പകരാൻ ഞാൻ വളരെയധികം ആഗ്രഹിക്കുന്നുണ്ട്.അവർ മുമ്പ് സന്തോഷിച്ച പോലെ,അതല്ലെങ്കിൽ അതിനേക്കാൾ കൂടുതൽ എനിക്ക് അവരെ സന്തോഷിപ്പിക്കണം. കാരണം ടീം നല്ല നിലയിലാണെങ്കിലും മോശം നിലയിലാണെങ്കിലും ടീമിനൊപ്പം നിൽക്കുന്നവരാണ് അവർ.അവർ എപ്പോഴും ടീമിനെ പിന്തുണച്ചു കൊണ്ടേയിരിക്കും.അതുകൊണ്ടുതന്നെ ഈ വരുന്ന സീസണിൽ ആരാധകർക്ക് പരമാവധി സന്തോഷം നൽകാൻ ഞങ്ങൾ ശ്രമിക്കും ” ഇതാണ് റോബർട്ട് ലെവന്റോസ്ക്കി പറഞ്ഞിട്ടുള്ളത്.

ബാഴ്സക്ക് വേണ്ടി ലെവന്റോസ്ക്കി തന്റെ അരങ്ങേറ്റം കുറിച്ചിട്ടില്ല. നാളെ നടക്കുന്ന എൽ ക്ലാസ്സിക്കോ മത്സരത്തിൽ അദ്ദേഹം അരങ്ങേറുമെന്നാണ് പലരും പ്രതീക്ഷിക്കുന്നത്.