നെയ്മർക്ക് എപ്പോഴേ ബാലൺ ഡി’ഓർ ലഭിക്കേണ്ടതായിരുന്നു : PSG സൂപ്പർ താരം!

ഫുട്ബോൾ ലോകത്തെ ഏറ്റവും മികച്ച താരത്തിന് നൽകപ്പെടുന്ന ബാലൺ ഡി’ഓർ പുരസ്കാരം ഇതുവരെ നേടാൻ സൂപ്പർതാരം നെയ്മർ ജൂനിയർക്ക് സാധിച്ചിട്ടില്ല. ആദ്യ മൂന്നിൽ ഇടംപിടിച്ചതാണ് ഇക്കാര്യത്തിൽ നെയ്മറുടെ ഏറ്റവും വലിയ നേട്ടം. എന്നാൽ സമീപകാലത്ത് അത്ര തിളങ്ങാൻ കഴിയാത്ത നെയ്മറെ പിഎസ്ജി കൈമാറാനും ഇപ്പോൾ ആലോചിക്കുന്നുണ്ട്.

എന്നാൽ താരത്തെ വാനോളം പുകഴ്ത്തിക്കൊണ്ട് പിഎസ്ജി സൂപ്പർതാരമായ ആന്റർ ഹെരേര ഇപ്പോൾ രംഗത്ത് വന്നിട്ടുണ്ട്. അതായത് നെയ്മർക്ക് എപ്പോഴേ ബാലൺ ഡി’ഓർ പുരസ്കാരം ലഭിക്കേണ്ടതായിരുന്നു എന്നാണ് ഹെരേര പറഞ്ഞിട്ടുള്ളത്.ലോകത്തിലെ ഏറ്റവും മികച്ച അഞ്ച് താരങ്ങളിൽ ഒരാളാണ് നെയ്മർ ജൂനിയറെന്നും ഇദ്ദേഹം കൂട്ടിച്ചേർത്തിട്ടുണ്ട്.ഹെരേരയുടെ വാക്കുകൾ ഗോൾ ഡോട്ട് കോം റിപ്പോർട്ട് ചെയ്യുന്നത് ഇങ്ങനെയാണ്.

” ഞാനും നെയ്മറും അടുത്ത സുഹൃത്തുക്കളാണ്. കൂടാതെ അദ്ദേഹം മികച്ച ഒരു സഹതാരം കൂടിയാണ്. ഒരു ഫുട്ബോളർ എന്ന നിലയിൽ ലോകത്തിലെ ഏറ്റവും മികച്ച 5 താരങ്ങളിൽ ഒരാളാണ് നെയ്മർ ജൂനിയർ.എപ്പോഴേ അദ്ദേഹത്തിന് ബാലൺ ഡി’ഓർ ലഭിക്കേണ്ടതായിരുന്നു എന്നാണ് ഞാൻ കരുതുന്നത്. പക്ഷേ ഞാൻ ഇനിയും അതിനുള്ള സാധ്യതകളെ തള്ളിക്കളയുന്നില്ല. അദ്ദേഹത്തോടൊപ്പം ഞാൻ ഒരുപാട് ആസ്വദിക്കുന്നു ” ഇതാണ് ഹെരേര പറഞ്ഞിട്ടുള്ളത്.

മാത്രമല്ല മെസ്സിയെയും അദ്ദേഹം പ്രശംസിച്ചിരുന്നു. ഫുട്ബോൾ ചരിത്രത്തിലെ ഏറ്റവും മികച്ച താരമാണ് ലയണൽ മെസ്സി എന്നാണ് ഹെരേര പറഞ്ഞിട്ടുള്ളത്.