സഹൽ ഹീറോയായി,ഇന്ത്യക്ക് മുന്നിൽ കീഴടങ്ങി അഫ്ഗാനിസ്ഥാനും!

AFC ഏഷ്യൻ കപ്പ് യോഗ്യതാ മത്സരത്തിൽ ഇന്ത്യക്ക് തുടർച്ചയായ രണ്ടാം വിജയം. ഒന്നിനെതിരെ രണ്ട് ഗോളുകൾക്ക് അഫ്ഗാനിസ്ഥാനെയാണ് ഇന്ത്യ പരാജയപ്പെടുത്തിയത്.മലയാളി താരം സഹൽ അബ്ദു സമദാണ് ഇന്ത്യയുടെ രക്ഷകനായത്.

മത്സരത്തിലെ ആദ്യ ഗോൾ നേടാൻ ഇന്ത്യക്ക് 86-ആം മിനുട്ട് വരെ കാത്തിരിക്കേണ്ടി വന്നു. സൂപ്പർ താരം സുനിൽ ഛേത്രിയാണ് ഇന്ത്യക്ക് ലീഡ് നേടി കൊടുത്തത്. ഒരു തകർപ്പൻ ഫ്രീകിക്കിൽ നിന്നാണ് ഛേത്രി ഗോൾ നേടിയത്. എന്നാൽ ഉടൻ തന്നെ അഫ്ഗാനിസ്ഥാൻ സമനില പിടിക്കുകയായിരുന്നു.88-ആം മിനുട്ടിൽ ഹാറൂണാണ് അഫ്ഗാന് വേണ്ടി വല ചലിപ്പിച്ചത്.

പിന്നീടാണ് മലയാളി ഗോൾ ഇന്ത്യയുടെ രക്ഷക്കെത്തിയത്. മലയാളി താരം ആഷിഖ് കുരുണിയന്റെ പാസിൽ നിന്നും സഹൽ ഗോൾ നേടുകയായിരുന്നു.91-ആം മിനുട്ടിലായിരുന്നു ഈ ഗോൾ പിറന്നത്.ഇതോടെ ഇന്ത്യ വിജയം ഉറപ്പിക്കുകയായിരുന്നു.

6 പോയിന്റുള്ള ഇന്ത്യ ഗ്രൂപ്പിൽ രണ്ടാംസ്ഥാനത്താണ്.ഇതേ പോയിന്റുള്ള ഹോങ്കോങ്ങാണ് ഒന്നാം സ്ഥാനത്ത്.ഇനി ഹോങ്കോങ്ങിനെതിരെയാണ് ഇന്ത്യ അടുത്ത മത്സരം കളിക്കേണ്ടത്.