മാർക്കിഞ്ഞോസ്,സിൽവ എന്നിവരെ താരതമ്യം ചെയ്ത് മുൻ ബ്രസീലിയൻ ഡിഫന്റർ!

2012 മുതൽ 2017 വരെ ഫ്രഞ്ച് വമ്പൻമാരായ പിഎസ്ജിക്ക് വേണ്ടി കളിച്ചിട്ടുള്ള ബ്രസീലിയൻ താരമാണ് മാക്ക്സ്വെൽ. ബ്രസീലിന്റെ മറ്റു ഡിഫന്റർമാരായ മാർക്കിഞ്ഞോസും തിയാഗോ സിൽവയും അന്ന് പിഎസ്ജിയുടെ നിരയിൽ ഉണ്ടായിരുന്നു. മാത്രമല്ല ബ്രസീലിന്റെ ദേശീയ ടീമിലും പ്രതിരോധനിര കാത്തിരുന്നത് ഈ രണ്ട് താരങ്ങളായിരുന്നു.

ഏതായാലും മാർക്കിഞ്ഞോസിനെയും തിയാഗോ സിൽവയെയും ഇപ്പോൾ മാക്സ്‌വെൽ ഒന്ന് താരതമ്യം ചെയ്തിട്ടുണ്ട്. രണ്ടുപേരും പ്രതിഭാധനരാണെന്നും എന്നാൽ മാർക്കിഞ്ഞോസിന്റെ പേഴ്സണാലിറ്റി സിൽവയെക്കാൾ കൂടുതൽ ഓപ്പണാണ് എന്നുമാണ് മാക്സ്‌വെൽ പറഞ്ഞിട്ടുള്ളത്. കഴിഞ്ഞ ദിവസം സോ ഫൂട്ടിനോട് സംസാരിക്കുകയായിരുന്നു അദ്ദേഹം. മാക്സ്‌വെല്ലിന്റെ വാക്കുകൾ ഇങ്ങനെയാണ്.

” മാർക്കിഞ്ഞോസും തിയാഗോ സിൽവയും അസാധാരണമായ ലീഡർമാരാണ്.എനിക്ക് മാർക്കിഞ്ഞോസുമായി ഒരു പ്രത്യേക ബന്ധമുണ്ടായിരുന്നു.ഞങ്ങൾ വളരെയധികം അടുത്ത സുഹൃത്തുക്കളായിരുന്നു. ഞാൻ അദ്ദേഹത്തെ ചെറിയ രൂപത്തിൽ സഹായിച്ചിട്ടുണ്ട്. അദ്ദേഹത്തിന്റെ വളർച്ച വീക്ഷിച്ചവനാണ് ഞാൻ. എന്നോടൊപ്പമായിരുന്നു അദ്ദേഹം കളിച്ചിരുന്നത്. ചെറുപ്രായത്തിൽ തന്നെ അദ്ദേഹം ടീമിലെത്തി. പക്ഷേ ടീമിൽ എങ്ങനെ സ്ഥാനം നേടിയെടുക്കണമെന്ന് അദ്ദേഹത്തിന് അറിയാമായിരുന്നു. അദ്ദേഹത്തിന് മികച്ച ഒരു പേഴ്സണാലിറ്റിയുണ്ട്. പേഴ്സണാലിറ്റിയുടെ കാര്യത്തിൽ അദ്ദേഹം സിൽവയേക്കാൾ കൂടുതൽ ഓപ്പണാണ്. പക്ഷെ രണ്ടു പേരും പ്രതിഭാധനരായ ഡിഫന്റർമാരാണ് ” ഇതാണ് മാക്സ്‌വെൽ പറഞ്ഞിട്ടുള്ളത്.

നിലവിൽ സിൽവ ചെൽസിക്ക് വേണ്ടിയാണ് കളിച്ചു കൊണ്ടിരിക്കുന്നത്.വേൾഡ് കപ്പിൽ ബ്രസീലിന്റെ പ്രതീക്ഷകൾ കാക്കാൻ രണ്ടുപേരും ഉണ്ടാകുമെന്നുറപ്പാണ്.