മാഞ്ചസ്റ്റർ യുണൈറ്റഡിന്റെ സൂപ്പർതാരത്തെ സ്വന്തമാക്കാൻ നീക്കമാരംഭിച്ച് സിറ്റി!

മാഞ്ചസ്റ്റർ യുണൈറ്റഡിന്റെ ഫ്രഞ്ച് സൂപ്പർ താരമായ പോൾ പോഗ്ബയുടെ ക്ലബുമായുള്ള കരാർ ഈ സീസണോട് കൂടിയാണ് അവസാനിക്കുക. ഈ കരാർ പുതുക്കാൻ പോൾ പോഗ്ബ താല്പര്യം പ്രകടിപ്പിച്ചിരുന്നില്ല.അതുകൊണ്ടുതന്നെ വരുന്ന സമ്മറിൽ ക്ലബ് വിടാനുള്ള ഒരുക്കത്തിലാണ് അദ്ദേഹം. ഇക്കാര്യം മാഞ്ചസ്റ്റർ യുണൈറ്റഡിന്റെ പരിശീലകനായ റാൾഫ് റാഗ്നിക്ക് സ്ഥിരീകരിക്കുകയും ചെയ്തിരുന്നു.

പിഎസ്ജി,യുവന്റസ് എന്നിവരാണ് പോഗ്ബക്ക് വേണ്ടി രംഗത്തുള്ളത്. ഇപ്പോഴിതാ മാഞ്ചസ്റ്റർ യുണൈറ്റഡിന്റെ നഗരവൈരികളായ മാഞ്ചസ്റ്റർ സിറ്റിക്ക് പോഗ്ബയെ ആവശ്യമുണ്ട്. ഇതിനുള്ള നീക്കങ്ങൾ അവർ ആരംഭിച്ചുകഴിഞ്ഞു എന്നാണ് പ്രമുഖ മാധ്യമമായ ഗോൾ ഡോട്ട് കോം കണ്ടെത്തിയിരിക്കുന്നത്.

മാഞ്ചസ്റ്റർ സിറ്റിയുടെ ബ്രസീലിയൻ മധ്യനിര താരമായ ഫെർണാണ്ടിഞ്ഞോ ഈ സീസണിൽ ക്ലബ്ബ് വിടുമെന്ന് സ്ഥിരീകരിച്ചിരുന്നു. ഈ സ്ഥാനത്തേക്കാണ് പെപ് ഗ്വാർഡിയോള പോഗ്ബയെ പരിഗണിക്കുന്നത്.എന്നാൽ വൈരികളായ സിറ്റിയിലേക്ക് പോഗ്ബ ചേക്കേറുമോ എന്നുള്ളത് നോക്കി കാണേണ്ട കാര്യമാണ്.

29 കാരനായ താരം 2016-ലായിരുന്നു റെക്കോർഡ് തുകക്ക് മാഞ്ചസ്റ്റർ യുണൈറ്റഡിലേക്ക് ചേക്കേറിയത്. ആറ് വർഷക്കാലം യുണൈറ്റഡിൽ ചെലവഴിച്ച പോഗ്ബക്ക് വേണ്ട രൂപത്തിൽ തിളങ്ങാൻ സാധിച്ചിരുന്നില്ല. ഇതോടെയാണ് താരം ക്ലബ് വിടാൻ തീരുമാനിച്ചത്. ഈ സീസണിൽ പരിക്ക് മൂലം കൂടുതൽ മത്സരങ്ങൾ കളിക്കാൻ പോഗ്ബക്ക് സാധിച്ചിരുന്നില്ല.20 പ്രീമിയർ ലീഗ് മത്സരങ്ങൾ കളിച്ച താരം 1 ഗോളും 9 അസിസ്റ്റുമാണ് ഇതുവരെ കരസ്ഥമാക്കിയിട്ടുള്ളത്.