അതെന്റെ സ്വപ്നമാണ് : ബ്രസീലിയൻ സൂപ്പർ താരം ന്യൂകാസിലിലേക്ക് വരുന്നതിനെ കുറിച്ച് ബ്രൂണോ പറയുന്നു!

ഈ കഴിഞ്ഞ ജനുവരി ട്രാൻസ്ഫർ ജാലകത്തിലായിരുന്നു ബ്രസീലിയൻ സൂപ്പർ താരമായ ബ്രൂണോ ഗിമിറസ് പ്രീമിയർ ലീഗ് ക്ലബ്ബായ ന്യൂകാസിൽ യുണൈറ്റഡിലേക്ക് എത്തിയത്. തുടർന്ന് മിന്നുന്ന പ്രകടനമാണ് ബ്രൂണോ ഇപ്പോൾ നടത്തിക്കൊണ്ടിരിക്കുന്നത്. 13 മത്സരങ്ങളിൽ നിന്ന് നാലു ഗോളുകൾ നേടാൻ ഈ മധ്യനിര താരത്തിന് സാധിച്ചു.ന്യൂകാസിലിനെ റെലഗേഷൻ സോണിൽ നിന്നും രക്ഷിക്കുന്നതിൽ വലിയൊരു പങ്ക് ബ്രൂണോക്കുണ്ട്.

ഏതായാലും ബ്രസീലിന്റെ മറ്റൊരു സൂപ്പർ താരമായ ലുകാസ് പക്വറ്റ ന്യൂകാസിലിലേക്ക് എത്താൻ ആഗ്രഹിക്കുന്നു എന്നുള്ള കാര്യം ബ്രൂണോ ഗിമിറസ് ഇപ്പോൾ തുറന്നു പറഞ്ഞിട്ടുണ്ട്.അതെന്റെ സ്വപ്നമാണ് എന്നാണ് ബ്രൂണോ പറഞ്ഞത്.ലിയോണിൽ ഇരുവരും ഒരുമിച്ചായിരുന്നു കളിച്ചിരുന്നത്. മാത്രമല്ല വളരെ അടുത്ത സുഹൃത്തുക്കളാണ് ബ്രൂണോയും പക്വറ്റയും.ബ്രൂണോയുടെ വാക്കുകളെ ഇഎസ്പിഎൻ റിപ്പോർട്ട് ചെയ്യുന്നത് ഇങ്ങനെയാണ്.

“പക്വറ്റ ന്യൂകാസിലേക്ക് വരിക എന്നുള്ളത് എന്റെ സ്വപ്നമാണ്.അദ്ദേഹം എന്റെ അടുത്ത സുഹൃത്താണ്.കളത്തിൽ മാത്രമല്ല ഞങ്ങൾ ബന്ധം വെച്ചു പുലർത്തുന്നത്, മറിച്ച് കളത്തിനു പുറത്തും ഞങ്ങൾ എപ്പോഴും ഒരുമിച്ചായിരിക്കും. ഞങ്ങൾ തമ്മിൽ ഒരു സാഹോദര്യബന്ധമാണുള്ളത്. ഞങ്ങൾ ഇപ്പോഴും എല്ലാ ദിവസവും സംസാരിക്കാറുണ്ട്. അദ്ദേഹം ഇങ്ങോട്ട് വരികയാണെങ്കിൽ അത് ഒരു മികച്ച കാര്യമായിരിക്കും.പക്ഷെ അത് എനിക്ക് ഒറ്റക്ക് ചെയ്യാൻ കഴിയുന്ന ഒരു കാര്യമല്ലല്ലോ? ” ഇതാണ് ബ്രൂണോ പറഞ്ഞിട്ടുള്ളത്.

നിലവിൽ ലിയോണിന് വേണ്ടി മോശമല്ലാത്ത രൂപത്തിൽ പക്വറ്റ കളിച്ചു കൊണ്ടിരിക്കുന്നുണ്ട്. ലീഗ് വണ്ണിൽ 8 ഗോളുകളും 6 അസിസ്റ്റുകളും താരം കരസ്ഥമാക്കിയിട്ടുണ്ട്.