മിന്നും ഫോമിൽ ബെൻസിമ,കന്നി ബാലൺ ഡി’ഓർ സ്വന്തമാക്കുമോ?

ഈ സീസണിൽ സ്വപ്നതുല്യമായ പ്രകടനമാണ് സൂപ്പർതാരമായ കരിം ബെൻസിമ കാഴ്ച്ചവെക്കുന്നത്.ഏറെക്കുറെ റയലിനെ ഒറ്റക്ക് ചുമലിലേറ്റുന്നത് ബെൻസിമയാണ്. നിലവിൽ ഈ വർഷത്തെ ബാലൺ ഡി’ഓർ പുരസ്കാരം നേടാൻ ഏറ്റവും കൂടുതൽ സാധ്യത കൽപ്പിക്കപ്പെടുന്നത് താരവും ബെൻസിമ തന്നെയാണ്. തന്റെ കരിയറിലെ കന്നി ബാലൺ ഡി’ഓർ സ്വന്തമാക്കാൻ ബെൻസിമക്ക് ഇത്തവണ കഴിയുമോ എന്നുള്ളതാണ് ആരാധകർ ഉറ്റുനോക്കി കൊണ്ടിരിക്കുന്ന കാര്യം.

കഴിഞ്ഞ ചാമ്പ്യൻസ് ലീഗ് മത്സരത്തിൽ സിറ്റിയോട് പരാജയപ്പെട്ടപ്പോഴും രണ്ട് ഗോളുകൾ നേടി കൊണ്ട് റയലിന്റെ പ്രതീക്ഷകൾ സജീവമാക്കിയത് ബെൻസിമയാണ്.പിഎസ്ജിക്കെതിരെയും ചെൽസിക്കെതിരെയും ഹാട്രിക് നേടിക്കൊണ്ട് റയലിനെ മുന്നോട്ട് നയിച്ചതും ഇതേ ബെൻസിമ തന്നെയാണ്. ഈ സീസണിൽ 46 ഗോളുകളും 14 അസിസ്റ്റുകളുമാണ് ബെൻസിമ കരസ്ഥമാക്കിയിട്ടുള്ളത്.ലാലിഗയിൽ ഏറ്റവും കൂടുതൽ ഗോളുകളും അസിസ്റ്റുകളും നേടിയ താരം ബെൻസിമയാണ്. ചാമ്പ്യൻസ് ലീഗിലെ ടോപ് സ്കോററും ബെൻസിമ തന്നെയാണ്.

റയലിന് സൂപ്പർ ഡി കോപ എസ്പാനയും ഫ്രാൻസിന് യുവേഫ നേഷൻസ് ലീഗുമൊക്കെ നേടിക്കൊടുക്കുന്നതിൽ നിർണായക പങ്കുവഹിക്കാൻ ബെൻസിമക്ക് സാധിച്ചിട്ടുണ്ട്. കൂടാതെ റയൽമാഡ്രിഡ് ഏറെക്കുറെ ലാലിഗ കിരീടവും ഉറപ്പിച്ചിട്ടുണ്ട്.അതുകൊണ്ടുതന്നെ പലരും ഇത്തവണ സാധ്യത കൽപ്പിക്കുന്നത് ബെൻസിമക്ക് തന്നെയാണ്. കഴിഞ്ഞവർഷം നാലാം സ്ഥാനത്തായിരുന്നു ഈ സൂപ്പർ താരം ഫിനിഷ് ചെയ്തിരുന്നത്.

എന്നാൽ ബെൻസിമക്ക് വെല്ലുവിളി ഉയർത്തുന്ന ചില താരങ്ങൾ ഇപ്പോഴുമുണ്ട്.മുഹമ്മദ് സലാ,സാഡിയോ മാനെ,കെവിൻ ഡി ബ്രൂയിന എന്നിവരൊക്കെ അവരിൽ പെട്ടവരാണ്. പക്ഷേ നിലവിലെ സാഹചര്യത്തിൽ ബെൻസിമ വളരെയധികം മുൻപിലാണ് എന്ന് തന്നെ വിലയിരുത്തേണ്ടി വരും. അത്ഭുതങ്ങളൊന്നും സംഭവിച്ചില്ലെങ്കിൽ ഇത്തവണത്തെ ബാലൺ ഡി’ഓർ പുരസ്കാരം ബെൻസിമ തന്റെ ഷെൽഫിലെത്തിച്ചേക്കും.