മഗ്വയ്റുടെ സ്ഥാനം ചോദ്യം ചെയ്ത് സഹതാരങ്ങൾ,യുണൈറ്റഡിൽ കാര്യങ്ങൾ വഷളാകുന്നു!

വലിയ തുക മുടക്കി കൊണ്ട് പ്രതീക്ഷയോട് കൂടി മാഞ്ചസ്റ്റർ യുണൈറ്റഡ് സ്വന്തമാക്കിയ ഡിഫന്ററാണ് ഹാരി മഗ്വയ്ർ. ക്ലബ്ബ് അദ്ദേഹത്തിന് ക്യാപ്റ്റൻ സ്ഥാനവും നൽകിയിരുന്നു. എന്നാൽ പലപ്പോഴും മോശംപ്രകടനമായിരുന്നു മഗ്വയ്ർ പുറത്തെടുത്തിരുന്നത്.താരം അബദ്ധങ്ങൾ പലപ്പോഴും ആവർത്തിച്ചു.ഈ സീസണിലും താരം മോശം പ്രകടനം തന്നെയാണ് നടത്തുന്നത്.

ഇപ്പോഴിതാ പ്രമുഖ മാധ്യമമായ ദി ടൈംസ് ഒരു റിപ്പോർട്ട് പുറത്തുവിട്ടിട്ടുണ്ട്.അതായത് ചില യുണൈറ്റഡ് താരങ്ങൾ ഹാരി മഗ്വയ്റുടെ ക്ലബ്ബിലെ സ്ഥാനം സ്വകാര്യമായി ചോദ്യം ചെയ്തു എന്നാണ് ഇവർ കണ്ടെത്തിയിരിക്കുന്നത്. സ്ഥിരമായി ആദ്യ ഇലവനിൽ ഇടം ലഭിക്കുന്ന താരമാണ് മഗ്വയ്ർ.എന്നാൽ യുണൈറ്റഡിനെ പോലെയുള്ള ഒരു ക്ലബ്ബിന് വേണ്ടി കളിക്കാനുള്ള നിലവാരം ഹാരി മഗ്വയ്ർക്കില്ല എന്നാണ് ചില സഹതാരങ്ങൾ വിശ്വസിക്കുന്നത്. അതുകൊണ്ടുതന്നെ താരത്തിന് തുടർച്ചയായി അവസരങ്ങൾ ലഭിക്കുന്നതിൽ ചിലർ അതൃപ്തരാണ്. ഇക്കാര്യം അവർ ക്ലബ്ബിനകത്ത് ചർച്ച ചെയ്തു എന്നുമാണ് ഇവർ റിപ്പോർട്ട് ചെയ്തിരിക്കുന്നത്.

നേരത്തെ തന്നെ ഹാരി മഗ്വയ്റുമായി ബന്ധപ്പെട്ട ചില വിവാദങ്ങൾ ഉണ്ടായിരുന്നു.അതായത് മാഞ്ചസ്റ്റർ യുണൈറ്റഡിനകത്ത് ക്രിസ്റ്റ്യാനോയും ഹാരി മഗ്വയ്റും തമ്മിൽ അധികാരത്തർക്കം നിലനിന്നിരുന്നു എന്നായിരുന്നു ചില മാധ്യമങ്ങൾ റിപ്പോർട്ട് ചെയ്തിരുന്നത്.ഹാരി മഗ്വയ്റുടെ ക്യാപ്റ്റൻസിയിൽ ക്രിസ്റ്റ്യാനോ അതൃപ്തനാണെന്നും താരം ക്യാപ്റ്റനാവാൻ ആഗ്രഹിക്കുന്നു എന്നുമായിരുന്നു ചില മാധ്യമങ്ങൾ റിപ്പോർട്ട് ചെയ്തിരുന്നത്. എന്നാൽ ഇത് നിഷേധിച്ചു കൊണ്ട് മഗ്വയ്ർ നേരിട്ട് രംഗത്ത് വരികയും ചെയ്തിരുന്നു. തന്റെ സോഷ്യൽ മീഡിയ അക്കൗണ്ടുകളിലൂടെയാണ് മഗ്വയ്ർ ഇക്കാര്യം പൂർണമായും തള്ളിക്കളഞ്ഞത്.

പക്ഷേ സഹതാരങ്ങൾ തന്റെ സ്ഥാനം ചോദ്യം ചെയ്തു എന്നുള്ള റൂമറിൽ മഗ്വയ്ർ ഇതുവരെ പ്രതികരണം രേഖപ്പെടുത്തിയിട്ടില്ല. മാഞ്ചസ്റ്റർ സിറ്റിക്കെതിരെയുള്ള മത്സരത്തിന് മുന്നോടിയായുള്ള പത്രസമ്മേളനത്തിൽ ഒരുപക്ഷേ ഈ വിഷയം ചർച്ചയായേക്കും.ഏതായാലും ഹാരി മഗ്വയ്റുടെ കാര്യത്തിൽ പുതിയ എന്തെങ്കിലും തീരുമാനങ്ങൾ റാൾഫ് കൈകൊള്ളുമോ എന്നുള്ളത് കാത്തിരുന്നു കാണേണ്ടിയിരിക്കുന്നു.