പിഎസ്ജി സൂപ്പർതാരത്തിൽ താല്പര്യം പ്രകടിപ്പിച്ച് സ്പാനിഷ് വമ്പൻമാർ !

ഈ സീസണിൽ ഫ്രഞ്ച് വമ്പൻമാരായ പിഎസ്ജിയിലേക്ക് ആദ്യമെത്തിയ താരമാണ് വൈനാൾഡം.ലിവർപൂളിൽ നിന്നായിരുന്നു ഈ മധ്യനിര താരം ഫ്രീ ഏജന്റായി കൊണ്ട് പിഎസ്ജിയിൽ എത്തിയത്. എന്നാൽ വേണ്ടത്ര അവസരങ്ങൾ വൈനാൾഡത്തിന് ക്ലബ്ബിൽ ലഭിച്ചിരുന്നില്ല. അവസരങ്ങൾ ലഭിക്കാത്തതിൽ താൻ ഹാപ്പിയല്ല എന്നുള്ള കാര്യം വൈനാൾഡം തുറന്നു പറയുകയും ചെയ്തിരുന്നു.

അതുകൊണ്ടുതന്നെ താരം വരുന്ന സമ്മറിൽ ക്ലബ്ബ് വിട്ടേക്കുമെന്നുള്ള റൂമറുകൾ സജീവമാണ്. ഇപ്പോഴിതാ സ്പാനിഷ് വമ്പന്മാരായ അത്ലറ്റിക്കോ മാഡ്രിഡും താരത്തിൽ താല്പര്യം പ്രകടിപ്പിച്ചു കൊണ്ട് രംഗത്ത് വന്നിട്ടുണ്ട്.വൈനാൾഡത്തിന്റെ നിലവിലെ സാഹചര്യങ്ങൾ നിരീക്ഷിക്കുകയാണ് അത്ലറ്റിക്കോ. താരം ക്ലബ്ബ് വിടാൻ തീരുമാനിച്ചാൽ അത്ലറ്റിക്കോ നീക്കങ്ങൾ നടത്തിയേക്കും. സ്പാനിഷ് മാധ്യമമായ മുണ്ടോ ഡിപ്പാർട്ടിവോയാണ് ഇക്കാര്യം റിപ്പോർട്ട് ചെയ്തിരിക്കുന്നത്.

നേരത്തെ തന്നെ മറ്റു ക്ലബ്ബുകളുമായി വൈനാൾഡത്തെ ബന്ധപ്പെടുത്തിക്കൊണ്ട് റൂമറുകൾ ഉണ്ടായിരുന്നു. പ്രീമിയർ ലീഗ് ക്ലബ്ബുകളായ ന്യൂകാസിൽ യുണൈറ്റഡ്, വെസ്റ്റ് ഹാം,ആസ്റ്റൻ വില്ല എന്നിവരൊക്കെ ഈ ഡച്ച് താരത്തിൽ താല്പര്യം അറിയിച്ചിരുന്നു. എന്നാൽ പിന്നീട് പുരോഗതികളൊന്നും ഉണ്ടാവാതെ പോവുകയായിരുന്നു.ക്ലബ്‌ വിടാൻ നിൽക്കുന്ന ഹെക്ടർ ഹെരെരയുടെ സ്ഥാനത്തേക്കാണ് നിലവിൽ അത്ലറ്റിക്കോ താരത്തെ പരിഗണിക്കുന്നത്.

പിഎസ്ജിക്ക് വേണ്ടി ആകെ കളിച്ച 28 മത്സരങ്ങളിൽ നിന്ന് 3 ഗോളുകളാണ് ഈ മധ്യനിര താരം നേടിയിട്ടുള്ളത്. പല മത്സരങ്ങളിലും പകരക്കാരന്റെ രൂപത്തിലായിരുന്നു വൈനാൾഡം ഇറങ്ങിയിരുന്നത്.