ചാമ്പ്യൻസ് ലീഗ് കിരീടം നേടാൻ എംബപ്പേ പിഎസ്ജിയിൽ തുടരണം : ബുഫൺ

സൂപ്പർ താരം കിലിയൻ എംബപ്പേയുടെ കരാർ ഈ സീസണോട് കൂടിയാണ് അവസാനിക്കുക.താരം പിഎസ്ജിയിൽ തുടരുമോ ഇല്ലയോ എന്നുള്ള കാര്യത്തെക്കുറിച്ച് ഇതുവരെ തീരുമാനമെടുത്തിട്ടില്ല.കഴിഞ്ഞ റയലിനെതിരെയുള്ള മത്സരത്തിൽ പിഎസ്ജിയുടെ വിജയഗോൾ എംബപ്പേയായിരുന്നു നേടിയിരുന്നത്. ഇതോടെ താരത്തെ നിലനിർത്തണമെന്ന ആവശ്യം പിഎസ്ജി ആരാധകർക്കിടയിൽ ശക്തമായിരുന്നു.

ഏതായാലും ഈ വിഷയത്തിൽ മുൻ പിഎസ്ജി ഗോൾകീപ്പറും ഇറ്റാലിയൻ ഇതിഹാസവുമായ ജിയാൻ ലൂയിജി ബുഫൺ തന്റെ അഭിപ്രായം അറിയിച്ചിട്ടുണ്ട്. അതായത് ചാമ്പ്യൻസ് ലീഗ് കിരീടം നേടാൻ വേണ്ടി എംബപ്പേ പിഎസ്ജിയിൽ തുടരണമെന്നാണ് ഇദ്ദേഹം പറഞ്ഞിരിക്കുന്നത്. കഴിഞ്ഞ ദിവസം കനാൽ പ്ലസിനോട് സംസാരിക്കുകയായിരുന്നു അദ്ദേഹം. ബുഫണിന്റെ വാക്കുകൾ ഇങ്ങനെയാണ്.

” ഞാൻ എംബപ്പേയായിരുന്നുവെങ്കിൽ പിഎസ്ജിയിൽ തന്നെ തുടരുമായിരുന്നു. തീർച്ചയായും അവർക്ക് എംബപ്പേയിൽ വലിയ ആത്മവിശ്വാസമുണ്ട്.അവൻ വളരെ പ്രധാനപ്പെട്ട ഒരു കാര്യമാണ്,യുവതാരവുമാണ്.പിഎസ്ജി ഇതുവരെ ഒരൊറ്റ ചാമ്പ്യൻസ് ലീഗ് കിരീടം പോലും നേടിയിട്ടില്ല.അതാണ് എംബപ്പേയുടെ മുന്നിലുള്ള ചാലഞ്ച്.എനിക്ക് മറ്റൊരു ലക്ഷ്യവും ഉണ്ടാവാൻ പാടില്ല,ഞാൻ പിഎസ്ജിയിൽ തന്നെ തുടർന്നു കൊണ്ട് ചാമ്പ്യൻസ് ലീഗ് കിരീടം നേടണം.എന്റെ അഭിപ്രായത്തിൽ ഇതാണ് ഇപ്പോൾ എംബപ്പേ ചിന്തിക്കേണ്ടത്.താൻ വളരെയധികം സ്നേഹിക്കപ്പെടുന്നുണ്ടെന്ന് എംബപ്പേക്ക് അനുഭവപ്പെടണം.താരങ്ങൾ തമ്മിൽ ഈഗോ ഉണ്ടാവുന്നത് സാധാരണമായ ഒരു കാര്യമാണ്.പക്ഷേ അത് പരിഹരിക്കപ്പെടണം. താൻ വളരെ പ്രധാനപ്പെട്ട താരമാണ് എന്നുള്ളത് എംബപ്പേ കരുതേണ്ടതുണ്ട് ” ബുഫൺ പറഞ്ഞു.

2018 മുതൽ 2020 വരെ പിഎസ്ജിക്ക് വേണ്ടി കളിച്ച താരമാണ് ബുഫൺ.നിലവിൽ ഇറ്റാലിയൻ ക്ലബായ പാർമക്ക് വേണ്ടിയാണ് താരം കളിച്ചു കൊണ്ടിരിക്കുന്നത്.