സൂപ്പർ താരങ്ങൾ ഗോളടിച്ചു,പരാഗ്വയെ തരിപ്പണമാക്കി ബ്രസീൽ!

ഒടുവിൽ ബ്രസീൽ വിജയ വഴിയിലേക്ക് തിരിച്ചെത്തി, അതും തകർപ്പൻ ജയം കരസ്ഥമാക്കി കൊണ്ട്. ഇന്ന് നടന്ന വേൾഡ് കപ്പ് യോഗ്യതാ മത്സരത്തിൽ എതിരില്ലാത്ത നാലു ഗോളുകൾക്കാണ് ബ്രസീൽ പരാഗ്വേയെ പരാജയപ്പെടുത്തിയത്.യുവസൂപ്പർതാരങ്ങൾ എല്ലാവരും തന്നെ നിറയൊഴിക്കുകയായിരുന്നു.കൂട്ടിഞ്ഞോ,റഫീഞ്ഞ,ആന്റണി,റോഡ്രിഗോ എന്നിവരാണ് ബ്രസീലിന് വേണ്ടി ഗോളുകൾ നേടിയത്.ഇരട്ട അസിസ്റ്റുകൾ നേടി മാർക്കിഞ്ഞോസും തിളങ്ങി.ഇതോടെ 15 മത്സരങ്ങളിൽനിന്ന് 39 പോയിന്റുള്ള ബ്രസീൽ ഒന്നാം സ്ഥാനത്ത് തന്നെ തുടരുകയാണ്.

റഫീഞ്ഞ,കുഞ്ഞ,വിനീഷ്യസ് എന്നിവരാണ് ബ്രസീലിന്റെ മുന്നേറ്റനിരയിൽ അണിനിരന്നത്.മത്സരത്തിന്റെ 28-ആം മിനുട്ടിൽ മാർക്കിഞ്ഞോസിന്റെ ലോങ്ങ് പാസ് സ്വീകരിച്ച റഫീഞ്ഞ വളരെ സുന്ദരമായി ഫിനിഷ് ചെയ്യുകയായിരുന്നു.62-ആം മിനുട്ടിലാണ് കൂട്ടിഞ്ഞോയുടെ തകർപ്പൻ ഗോൾ പിറക്കുന്നത്.മാർക്കിഞ്ഞോസിന്റെ പാസ് സ്വീകരിച്ച കൂട്ടിഞ്ഞോ ഒരു ഉജ്ജ്വല ഷോട്ടിലൂടെ പന്ത് വലയിലെത്തിച്ചു.86-ആം മിനുട്ടിൽ എവെർട്ടന്റെ പാസിൽ നിന്ന് സുന്ദരമായ ഒരു ഷോട്ടിലൂടെ ആന്റണിയും ഗോൾ വല ചലിപ്പിച്ചു.88-ആം മിനുട്ടിലാണ് റോഡ്രിഗോയുടെ ഗോൾ വരുന്നത്.ബ്രൂണോ ഗിമിറസിന്റെ പാസ് ഫിനിഷ് ചെയ്യേണ്ട ജോലിയെ റോഡ്രിഗോക്ക് ബാക്കിയുണ്ടായിരുന്നുള്ളൂ.