ലോകത്തിലെ ഏറ്റവും മികച്ച ക്ലബ്ബിലാണ് എംബപ്പേയുള്ളത് : റൊണാൾഡിഞ്ഞോ!

പിഎസ്ജിയുടെ ഫ്രഞ്ച് സൂപ്പർ താരം കിലിയൻ എംബപ്പേയുടെ ഭാവി എന്താവുമെന്നുള്ളത് ഫുട്ബോൾ ലോകത്ത് വലിയ ചർച്ചാവിഷയമാണ്. ഈ സീസണോട് കൂടി എംബപ്പേയുടെ ക്ലബുമായുള്ള കരാർ അവസാനിക്കും. ഇതുവരെ കരാർ പുതുക്കിയിട്ടില്ലാത്ത എംബപ്പേയെ റാഞ്ചാനുള്ള ഒരുക്കത്തിലാണ് വമ്പൻമാരായ റയൽ മാഡ്രിഡ്‌.

എന്നാൽ കിലിയൻ എംബപ്പേ പിഎസ്ജി വിടില്ലെന്നും ദീർഘകാലം എംബപ്പേ ക്ലബ്ബിൽ തന്നെ ഉണ്ടാവുമെന്നറിയിച്ചിരിക്കുകയാണിപ്പോൾ ബ്രസീലിയൻ ഇതിഹാസതാരമായ റൊണാൾഡിഞ്ഞോ. ലോകത്തിലെ ഏറ്റവും മികച്ച ക്ലബായ പിഎസ്ജിയിലാണ് ഇപ്പോൾ എംബപ്പേയുള്ളതെന്നും റൊണാൾഡിഞ്ഞോ കൂട്ടിച്ചേർത്തിട്ടുണ്ട്. കഴിഞ്ഞ ദിവസം പിഎസ്ജിയുടെ ഒഫീഷ്യൽ യൂട്യൂബ് ചാനലിനോട് സംസാരിക്കുകയായിരുന്നു ഇദ്ദേഹം. റൊണാൾഡിഞ്ഞോ പറഞ്ഞത് ഇങ്ങനെയാണ്.

” പിഎസ്ജിക്ക് വേണ്ടി കളിക്കുക എന്നുള്ളത് ഫുട്ബോൾ ലോകത്തെ ഒട്ടുമിക്ക താരങ്ങളുടെയും ആഗ്രഹമാണ്.ലോകത്തിലെ ഏറ്റവും മികച്ച ക്ലബാണ് പിഎസ്ജി.അത്കൊണ്ട് തന്നെ ദീർഘകാലം എംബപ്പേ പിഎസ്ജിയിൽ ഉണ്ടാവുമെന്നാണ് ഞാൻ കരുതുന്നത്.പിഎസ്ജി കരുത്തരാണ്. എംബപ്പേയെ സംബന്ധിച്ചിടത്തോളം ഈ പ്രായത്തിൽ തന്നെ ഒരുപാട് നേട്ടങ്ങൾ അദ്ദേഹം കരസ്ഥമാക്കിയിട്ടുണ്ട്.പക്ഷേ ചാമ്പ്യൻസ് ലീഗ് മാത്രമാണ് ഇപ്പോൾ അദ്ദേഹത്തിന് ലഭിക്കാത്തത്.പിഎസ്ജിയോടൊപ്പം അത് എംബപ്പേക്ക് നേടിയെടുക്കാൻ കഴിഞ്ഞാൽ അത് മഹത്തായ ഒരു കാര്യമായിരിക്കും.ഇത്തവണത്തെ ചാമ്പ്യൻസ് ലീഗ് നേടാൻ പിഎസ്ജിക്ക് കഴിയുമെന്നാണ് പലരും സങ്കൽപ്പിക്കുന്നത്. എന്തെന്നാൽ ഒരുപിടി സൂപ്പർ താരങ്ങൾ പിഎസ്ജിയിലുണ്ട് ” റൊണാൾഡിഞ്ഞോ പറഞ്ഞു.

2001 മുതൽ 2003 വരെ പിഎസ്ജിക്ക് വേണ്ടി കളിച്ച താരമാണ് റൊണാൾഡിഞ്ഞോ. അതേസമയം ഈ സീസണിലും എംബപ്പേ മികച്ച ഫോമിലാണ്.15 ഗോളുകളും 15 അസിസ്റ്റുകളും ഈ സീസണിൽ എംബപ്പേ നേടിക്കഴിഞ്ഞു.