സെലിബ്രേഷൻ പണിയായി, ക്രിസ്റ്റ്യാനോ പരിക്കിന്റെ ആശങ്കയിൽ!

കഴിഞ്ഞ ആഴ്സണലിനെതിരെയുള്ള മത്സരത്തിൽ ഉജ്ജ്വല പ്രകടനമാണ് സൂപ്പർ താരം ക്രിസ്റ്റ്യാനോ റൊണാൾഡോ കാഴ്ച്ചവെച്ചിരുന്നത്. ഇരട്ട ഗോളുകൾ നേടിക്കൊണ്ട് താരം മാഞ്ചസ്റ്റർ യുണൈറ്റഡിന് വിജയം നേടികൊടുക്കുകയായിരുന്നു.

ഗോൾ നേടിയതിന് ശേഷമുള്ള ക്രിസ്റ്റ്യാനോയുടെ സെലിബ്രേഷൻ ലോകപ്രശസ്തമാണ്. പലരും അനുകരിക്കാറുള്ള സെലിബ്രേഷനാണ് ക്രിസ്റ്റ്യാനോ റൊണാൾഡോയുടെ വായുവിൽ ഉയർന്ന് ചാടിയുള്ള സെലിബ്രേഷൻ. എന്നാൽ ഈ സെലിബ്രേഷൻ ക്രിസ്റ്റ്യാനോക്ക് ചെറിയൊരു പണി നൽകി എന്നുള്ള റിപ്പോർട്ടുകളാണ് കഴിഞ്ഞ ദിവസം പുറത്തേക്ക് വന്നത്.

ഈ സെലിബ്രേഷന് ശേഷം താരത്തിന്റെ കാൽമുട്ടിന് ചെറിയ അസ്വസ്ഥതകൾ അനുഭവപ്പെട്ടിട്ടുണ്ട്. ഇതാണ് ചെറിയൊരു ആശങ്ക പടർത്തുന്ന കാര്യം. പക്ഷേ ഇന്നത്തെ മത്സരത്തിൽ റൊണാൾഡോ കളിക്കുമെന്ന് തന്നെയാണ് പ്രതീക്ഷിക്കപ്പെടുന്നത്. പ്രമുഖ സ്പാനിഷ് മാധ്യമമായ മാർക്കയാണ് ഈ ആശങ്ക പങ്കു വെച്ചിട്ടുള്ളത്.

അതേസമയം ക്രിസ്റ്റ്യാനോ ഇനിയും ആ സെലിബ്രേഷൻ തുടരുമോ എന്നുള്ള കാര്യത്തിൽ സംശയമുണ്ട്. കാരണം കാൽമുട്ടിന് അത് കൂടുതൽ വിനയാകാൻ സാധ്യതയുണ്ട് എന്നാണ് കണ്ടെത്തൽ.

ഏതായാലും റാൾഫിന് കീഴിലെ ആദ്യ മത്സരത്തിനാണ് യുണൈറ്റഡ് ഇന്നിറങ്ങുന്നത്.ഇന്ന് രാത്രി ഇന്ത്യൻ സമയം 7:30-ന് ക്രിസ്റ്റൽ പാലസിനെയാണ് യുണൈറ്റഡ് നേരിടുക. മത്സരത്തിൽ ക്രിസ്റ്റ്യാനോ കളിക്കുമെന്ന് തന്നെയാണ് പ്രതീക്ഷിക്കപ്പെടുന്നത്.