ഒഫീഷ്യൽ : സിദാൻ റയലിനോട് വിടപറഞ്ഞു!

റയൽ മാഡ്രിഡ്‌ പരിശീലകനായ സിനദിൻ സിദാൻ റയലിന്റെ പരിശീലകസ്ഥാനമൊഴിഞ്ഞു. റയൽ തന്നെയാണ് ഇക്കാര്യം ഔദ്യോഗികമായി തങ്ങളുടെ വെബ്സൈറ്റ് വഴി അറിയിച്ചത്. സിദാന് റയലുമായി കരാർ അവശേഷിക്കുന്നുണ്ടെങ്കിലും പരിശീലകസ്ഥാനമൊഴിയാൻ സിദാൻ തീരുമാനിക്കുകയായിരുന്നു. ക്ലബ്ബിന്റെ ചരിത്രത്തിലെ ഏറ്റവും മികച്ച പരിശീലകരിൽ ഒരാളാണ് സിനദിൻ സിദാൻ. മുമ്പ് ഒരിക്കൽ ഇതു പോലെ രാജിവെച്ചിരുന്നുവെങ്കിലും റയലിന്റെ അഭ്യർത്ഥന മാനിച്ച് അദ്ദേഹം വീണ്ടും സ്ഥാനം ഏറ്റെടുക്കുകയായിരുന്നു. ദീർഘകാലം നിൽക്കാതെ അദ്ദേഹം വീണ്ടും പടിയിറങ്ങി.

വൽഡെബെബാസിൽ എത്തി സിദാൻ റയൽ താരങ്ങളോട് യാത്ര പറഞ്ഞതായി മാർക്ക റിപ്പോർട്ട്‌ ചെയ്തിട്ടുണ്ട്.ഒട്ടുമിക്ക റയൽ താരങ്ങളും സിദാന് സോഷ്യൽ മീഡിയയിലൂടെ വിടവാങ്ങൽ സന്ദേശം നൽകിയിട്ടുണ്ട്. സെർജിയോ റാമോസ്, റാഫേൽ വരാനെ,ഡാനി കാർവഹാൽ, കോർട്ടുവ എന്നിവരെല്ലാം തങ്ങളുടെ പ്രിയപ്പെട്ട പരിശീലകന് നന്ദി അറിയിച്ചിട്ടുണ്ട്. ഈ സീസണിൽ ഒരൊറ്റ കിരീടം പോലും നേടാനാവാതെയാണ് സിദാൻ പടിയിറങ്ങുന്നത് എന്നുള്ളത് ആരാധകർക്ക് സങ്കടമുണ്ടാക്കുന്ന കാര്യമാണ്. എന്നിരുന്നാലും പതിനൊന്ന് കിരീടങ്ങൾ നേടിയാണ് സിദാൻ മടങ്ങുന്നത്.