എംബപ്പേയെ റയൽ സൈൻ ചെയ്യുമോ? മറുപടി പറഞ്ഞ് സിദാൻ!

ഈ സീസണിൽ മിന്നും ഫോമിലാണ് യുവസൂപ്പർ താരം കിലിയൻ എംബാപ്പേ കളിക്കുന്നത്.32 ഗോളുകളും 9 അസിസ്റ്റുകളുമായി 41 ഗോൾപങ്കാളിത്തമാണ് ആകെ ഈ സീസണിൽ താരം നേടിയിട്ടുള്ളത്.45 ഗോൾപങ്കാളിത്തമുള്ള ഹാരി കെയ്ൻ,50 ഗോൾ പങ്കാളിത്തമുള്ള ലെവന്റോസ്ക്കി എന്നിവർക്ക് പിറകിലാണ് നിലവിൽ യൂറോപ്പിൽ എംബപ്പേയുടെ സ്ഥാനം. എന്നാൽ ഈ സീസണിൽ താരം പിഎസ്ജി വിട്ടുകൊണ്ട് മറ്റേതെങ്കിലും ക്ലബ്ബിലേക്ക് കൂടുമാറിയേക്കുമെന്നുള്ള അഭ്യൂഹങ്ങൾ സജീവമാണ്. താരം കരാർ പുതുക്കാൻ വിസമ്മതിച്ചാൽ പിഎസ്ജി താരത്തെ ഈ സമ്മറിൽ തന്നെ കൈവിടാനും സാധ്യതയുണ്ട്. അത്‌ മാത്രമല്ല റയലിന്റെ ഏറ്റവും വലിയ ലക്ഷ്യങ്ങളിൽ ഒന്നാണ് കിലിയൻ എംബപ്പേ. ഏതായാലും താരത്തെ ഈ സമ്മറിൽ റയൽ സൈൻ ചെയ്യുമോ എന്നുള്ളതിന് ഉത്തരം നൽകിയിരിക്കുകയാണ് റയൽ പരിശീലകൻ സിദാൻ. എംബപ്പെയുടെ ഭാവി അദ്ദേഹം തന്നെ തീരുമാനിക്കട്ടെ എന്നാണ് സിദാൻ ഇതിനോട് പ്രതികരിച്ചത്. കഴിഞ്ഞ ദിവസം പത്രസമ്മേളനത്തിൽ സംസാരിക്കുകയായിരുന്നു സിദാൻ.

” എംബപ്പെയെ കുറിച്ച് എനിക്കും ഞങ്ങൾക്കും നന്നായി അറിയാം.അത്രേയൊള്ളൂ.അദ്ദേഹം എന്റെ താരമല്ല. അത്കൊണ്ട് തന്നെ എംബപ്പെയെ കുറിച്ച് എനിക്ക് കൂടുതൽ സംസാരിക്കാനാവില്ല.അദ്ദേഹം ഒരു മികച്ച താരമാണ്.ഭാവിയെ കുറിച്ച് അദ്ദേഹം എന്ത് ചെയ്യണമെന്നുള്ളത് അദ്ദേഹം തന്നെ തീരുമാനിക്കട്ടെ.അത്‌ എന്റെ പരിഗണനയിൽ വരുന്ന കാര്യമല്ല ” സിദാൻ പറഞ്ഞു. സിദാന് കീഴിൽ കളിക്കാൻ താല്പര്യമുണ്ടെന്ന് താരം മുമ്പ് തന്നെ വെളിപ്പെടുത്തിയിരുന്നു. ഏതായാലും താരം റയലിലേക്ക് എത്തുമെന്ന പ്രതീക്ഷയിലാണ് നിലവിൽ റയൽ ആരാധകരുള്ളത്.