ആറു ദിവസത്തിനിടെ റയൽ പുറത്തായത് രണ്ട് കിരീടപ്പോരാട്ടങ്ങളിൽ, സിദാൻ പുറത്തേക്ക്?

ഇന്നലെ നടന്ന കോപ്പ ഡെൽ റേ പ്രീ ക്വാർട്ടറിൽ റയൽ മാഡ്രിഡ്‌ അപ്രതീക്ഷിത തോൽവി ഏറ്റുവാങ്ങിയിരുന്നു. ഒന്നിനെതിരെ രണ്ട് ഗോളുകൾക്ക്‌ അൽകൊയാനോയായിരുന്നു റയലിനെ അട്ടിമറിച്ചത്. ഇതോടെ കോപ്പ ഡെൽ റേയിൽ നിന്നും റയൽ മാഡ്രിഡ്‌ പുറത്തായി. ആറു ദിവസത്തിനിടെ രണ്ടാമത്തെ ചാമ്പ്യൻഷിപ്പിൽ നിന്നുമാണ് റയൽ പുറത്താവുന്നത്. ദിവസങ്ങൾക്ക്‌ മുമ്പ് സൂപ്പർ കോപ്പയുടെ സെമി ഫൈനലിലും റയൽ മാഡ്രിഡിന് അടിതെറ്റിയിരുന്നു. അത്‌ലെറ്റിക്ക് ബിൽബാവോയോടായിരുന്നു റയൽ മാഡ്രിഡ്‌ 2-1 എന്ന സ്കോറിന് പരാജയപ്പെട്ടത്. കിരീടം ബിൽബാവോ തന്നെ കൈക്കലാക്കുകയും ചെയ്തു. ഇതോടെ നേടാൻ സാധിക്കുമായിരുന്ന രണ്ട് കിരീടങ്ങളാണ് റയൽ മാഡ്രിഡ്‌ കളഞ്ഞു കുളിച്ചത്. ഇതോടെ പരിശീലകൻ സിദാന്റെ ഭാവി തുലാസിലാവുകയും ചെയ്തു.

ഇനി ചാമ്പ്യൻസ് ലീഗും ലാലിഗയും മാത്രമാണ് റയൽ മാഡ്രിഡിന് മുന്നിലുള്ളത്. നിലവിലെ ഫോം വെച്ച് പരിഗണിക്കുകയാണെങ്കിൽ അത്‌ വിദൂര സ്വപ്നം മാത്രമാവും. അതല്ല, പുരോഗതി പ്രാപിക്കുകയാണെങ്കിൽ തീർച്ചയായും സാധ്യത കല്പിക്കപ്പെടുന്ന ടീം തന്നെയാണ് റയൽ. ലാലിഗയിൽ അത്‌ലെറ്റിക്കോ മാഡ്രിഡ്‌ ബഹുദൂരം മുന്നിലാണ്. അതേസമയം ചാമ്പ്യൻസ് ലീഗിലാവട്ടെ അറ്റലാന്റയാണ് റയലിന്റെ എതിരാളികൾ. മുമ്പ് 2009/10 സീസണിൽ റയൽ മാഡ്രിഡ്‌ കോപ്പ ഡെൽ റേയിൽ ഇതേ ഘട്ടത്തിൽ തോൽവി അറിഞ്ഞിരുന്നു. ആ സീസണിൽ പരിശീലകനായിരുന്ന മാനുവൽ പെല്ലഗ്രിനിയെ റയൽ പിന്നീട് പുറത്താക്കുകയാണ് ചെയ്തത്. അതേ അവസ്ഥ തന്നെയാണ് ഇന്ന് സിദാനും അഭിമുഖീകരിക്കുന്നത്.