മെസ്സി ബാഴ്സ വിടുന്നത് കാണാനാണ് താൻ ഇഷ്ടപ്പെടുന്നതെന്ന് താരത്തിന്റെ കസിൻ

സൂപ്പർ താരം ലയണൽ മെസ്സി ബാഴ്സ വിട്ട് മറ്റേതെങ്കിലും ക്ലബിൽ കളിക്കുന്നത് കാണാനാണ് തനിക്കിഷ്ടമെന്ന് താരത്തിന്റെ കസിൻ സഹോദരനും ഫുട്ബോൾ താരവുമായ മാക്സി ബിയാൻസൂച്ചി. എന്നാൽ അദ്ദേഹത്തിന്റെ ഭാവിയെ പറ്റി ആർക്കും ഒന്നുമറിയില്ലെന്നും അദ്ദേഹം കൂട്ടിച്ചേർത്തു. കഴിഞ്ഞ ദിവസം ഫുട്ബോൾന്യൂസ്‌ 24 ന് നൽകിയ അഭിമുഖത്തിലാണ് അദ്ദേഹം മെസ്സിയുടെ ഭാവിയെ കുറിച്ച് സംസാരിച്ചത്. അർജന്റൈൻ താരങ്ങളായ പൌലോ ദിബാലയെ കുറിച്ചും ലൗറ്ററോ മാർട്ടിനെസിനെ കുറിച്ചും അദ്ദേഹം അഭിപ്രായം രേഖപ്പെടുത്തി.

” സത്യമെന്തെന്ന് വെച്ചാൽ അതെല്ലാം വ്യക്തപരമായ രഹസ്യങ്ങളാണ്. ആർക്കും അതിനെ കുറിച്ച് ഒന്നുമറിയില്ല. വ്യക്തിപരമായി, മെസ്സി മറ്റൊരു ക്ലബിൽ കളിക്കുന്നത് കാണാനാണ് എനിക്കിഷ്ടം. പലരും പറയുന്നത് മെസ്സിക്ക് ബാഴ്സയിൽ മാത്രമേ തിളങ്ങാനാവൊള്ളൂ എന്നാണ്. അത് തെറ്റാണ് എന്ന് തെളിയിക്കാനുള്ള അവസരം ക്ലബ്‌ വിട്ടാൽ മെസ്സിക്ക് ലഭിക്കും. സത്യമെന്തെന്നാൽ, മെസ്സി എവിടെ കളിച്ചാലും മികച്ച പ്രകടനം കാഴ്ച്ചവെക്കാൻ അദ്ദേഹത്തിന് കഴിയും. ഇറ്റലിയിലെ ഏതെങ്കിലും ക്ലബിൽ അദ്ദേഹത്തെ കാണാൻ ഞാൻ ഇഷ്ടപ്പെടുന്നില്ല. ന്യൂവെൽസ് ഓൾഡ് ബോയ്സിന്റെ ജേഴ്സി ഒരു തവണ കൂടി മെസ്സി അണിയുന്നത് കാണാൻ കൊതിക്കുന്ന ഒരാളാണ് ഞാൻ ” മെസ്സിയുടെ കസിൻ പറഞ്ഞു.

” നിലവിൽ അർജന്റീനക്ക് ഒരുപാട് യുവപ്രതിഭകൾ ഉണ്ട്. അതിൽ മുന്നിൽ നിൽക്കുന്നവരാണ് പൌലോ ദിബാലയും ലൗറ്ററോ മാർട്ടിനെസും. രണ്ടു പേരും പെട്ടന്ന് കളി മെച്ചപ്പെട്ടു വരുന്ന താരങ്ങളാണ്. ഒരുപാട് കാലം ഇരുവർക്കും മികച്ച ഫോം തുടരാനാവുമെന്നാണ് ഞാൻ പ്രതീക്ഷിക്കുന്നത് ” മാക്സി ബിയാൻസുച്ചി പറഞ്ഞു.