ബെൻസിമയാണ് മികച്ചവൻ, സിദാൻ പറയുന്നു !

തന്നെ സംബന്ധിച്ചെടുത്തോളം കരിം ബെൻസിമയാണ് മികച്ച താരമെന്ന് റയൽ മാഡ്രിഡ്‌ പരിശീലകൻ സിനദിൻ സിദാൻ. ഇന്നലെ അത്‌ലെറ്റിക്ക്‌ ക്ലബ്ബിനെതിരെ നടന്ന മത്സരത്തിന് ശേഷം മാധ്യമങ്ങളോട് സംസാരിക്കുകയായിരുന്നു അദ്ദേഹം. ഒന്നിനെതിരെ മൂന്ന് ഗോളുകൾക്കായിരുന്നു റയൽ മാഡ്രിഡ്‌ വിജയം കൊയ്തത്. മത്സരത്തിൽ ഇരട്ടഗോളുകൾ നേടിക്കൊണ്ട് വിജയശില്പിയായത് കരിം ബെൻസിമയായിരുന്നു. കഴിഞ്ഞ ചാമ്പ്യൻസ് ലീഗിൽ ബൊറൂസിയ മോൺഷെൻഗ്ലാഡ്ബാഷിനെതിരെ നടന്ന മത്സരത്തിലും താരം റയലിനെ ഒറ്റക്ക് ചുമലിലേറ്റിയിരുന്നു. ഈ പ്രകടനങ്ങൾക്ക് പിന്നാലെയാണ് സിദാൻ താരത്തെ വാനോളം പ്രശംസിച്ചത്.

” എന്നെ സംബന്ധിച്ചെടുത്തോളം ബെൻസിമയാണ് മികച്ച താരം. അദ്ദേഹം ഒരുപാട് കാലം റയൽ മാഡ്രിഡിൽ ചിലവഴിച്ചു. മികച്ചവനാണെന്ന് സ്വയം തെളിയിച്ചു കൊണ്ടേയിരിക്കുന്നു. അദ്ദേഹം 500-ൽ പരം മത്സരങ്ങൾ കളിച്ചു. ഒരുപാട് ഗോളുകൾ നേടി. അദ്ദേഹത്തിന്റെ നേട്ടങ്ങളും ബഹുമതികളും അദ്ദേഹത്തെ കുറിച്ച് സംസാരിക്കുന്നു. തീർച്ചയായും എന്നെ സംബന്ധിച്ചെടുത്തോളം അദ്ദേഹം തന്നെയാണ് മികച്ചത്. അദ്ദേഹം ഒരു സമ്പൂർണനായ താരമാണ്. കേവലം ഒരു നമ്പർ നയൺ അല്ല ബെൻസിമ. അദ്ദേഹം ഗോൾ സ്കോർ ചെയ്യുന്നതിനെ പറ്റി മാത്രമല്ല ചിന്തിക്കാറുള്ളത്. അത്കൊണ്ടാണ് ഞാൻ അദ്ദേഹത്തെ ഇഷ്ടപ്പെടുന്നത്. സഹതാരങ്ങളുമായി നന്നായി ഒത്തിണങ്ങുന്ന താരമാണ് അദ്ദേഹം. അദ്ദേഹം ഗോളുകൾ സ്കോർ ചെയ്യുന്നു, അവസരങ്ങൾ ഒരുക്കി നൽകുന്നു. ടീമിന് എന്താണോ ആവിശ്യം, അത്‌ അദ്ദേഹം പ്രദാനം ചെയ്യുന്നു ” സിദാൻ പറഞ്ഞു.