അതുല്യനായ താരം, മികച്ച വ്യക്തി : അറിയപ്പെടാൻ ആഗ്രഹിക്കുന്നത് വെളിപ്പെടുത്തി ക്രിസ്റ്റ്യാനോ റൊണാൾഡോ!

ഫുട്ബോൾ ലോകത്ത് അപൂർവമായ റെക്കോർഡുകളും നേട്ടങ്ങളും സ്വന്തമാക്കിയിട്ടുള്ള താരമാണ് ക്രിസ്റ്റ്യാനോ റൊണാൾഡോ.900 ഒഫീഷ്യൽ ഗോളുകൾ അദ്ദേഹം പൂർത്തിയാക്കിയിരുന്നു. മാത്രമല്ല ചാമ്പ്യൻസ് ലീഗിൽ 183 മത്സരങ്ങൾ കളിച്ചതാരം 140 ഗോളുകൾ നേടിയിട്ടുണ്ട്. ഏറ്റവും കൂടുതൽ ചാമ്പ്യൻസ് ലീഗ് ഗോളുകൾ നേടിയ റൊണാൾഡോയെ യുവേഫ ഒരു പ്രത്യേക പുരസ്കാരം നൽകി ആദരിക്കുകയും ചെയ്തിരുന്നു.

താൻ എങ്ങനെ അറിയപ്പെടാനാണ് ആഗ്രഹിക്കുന്നത് ? ഇതേക്കുറിച്ചും മറ്റു പല കാര്യങ്ങളെക്കുറിച്ചും ക്രിസ്റ്റ്യാനോ റൊണാൾഡോ ഒരുപാട് സംസാരിച്ചിട്ടുണ്ട്.അദ്ദേഹത്തിന്റെ വാക്കുകൾ പരിശോധിക്കാം.

“അതുല്യനായ ഫുട്ബോൾ താരം,ജീവിതത്തിൽ മികച്ച ഒരു വ്യക്തി, ഇങ്ങനെ അറിയപ്പെടാനാണ് ഞാൻ ആഗ്രഹിക്കുന്നത്.അതാണ് ഏറ്റവും പ്രധാനപ്പെട്ട കാര്യം. ഇത്രയും വലിയ നിലയിൽ എത്തുമെന്ന് ഞാൻ ഒരിക്കലും സങ്കൽപ്പിച്ചിരുന്നില്ല. ഒരു പ്രൊഫഷണൽ ഫുട്ബോൾ താരം ആവുക എന്നുള്ളതായിരുന്നു എന്റെ ലക്ഷ്യം.ഒരുപാട് വെല്ലുവിളികൾ നേരിടേണ്ടിവന്നു.പക്ഷേ പല നഗരങ്ങളിലായി ജീവിക്കേണ്ടിവന്നത് ഒരിക്കലും എനിക്ക് ബുദ്ധിമുട്ട് ഉണ്ടാക്കിയിരുന്നില്ല. ഇത്തരം കാര്യങ്ങളുമായി ഞാൻ പഴകിയിരുന്നു.

യുവേഫയുടെ ആ അവാർഡ് ലഭിച്ചത് ഒരുപാട് സന്തോഷം നൽകി. എനിക്ക് അവാർഡുകൾ ലഭിക്കുന്ന സമയത്തൊക്കെ എന്റെ കുടുംബത്തെയും കുട്ടികളെയും ആണ് ഞാൻ ഓർക്കുക.അവർക്ക് അതൊക്കെ കാണാനുള്ള ഭാഗ്യം ലഭിക്കുന്നു. ഞാൻ ഫുട്ബോൾ കളിക്കുന്നതും ഗോളുകൾ നേടുന്നതും അവർ കാണുന്നു. അതുതന്നെ എന്നെ പ്രചോദിപ്പിക്കുന്ന ഒരു കാര്യമാണ് “ഇതാണ് റൊണാൾഡോ പറഞ്ഞിട്ടുള്ളത്.

39 കാരനായ റൊണാൾഡോ ഇപ്പോഴും മികച്ച പ്രകടനമാണ് നടത്തിക്കൊണ്ടിരിക്കുന്നത്. ഫുട്ബോൾ കരിയർ ഉടനെ ഒന്നും അവസാനിപ്പിക്കാൻ അദ്ദേഹം ആഗ്രഹിക്കുന്നില്ല.പോർച്ചുഗൽ ദേശീയ ടീമിനോടൊപ്പം അടുത്ത വേൾഡ് കപ്പ് കൂടി കളിക്കാൻ താരം ആഗ്രഹിക്കുന്നുണ്ട്. ആയിരം ഒഫീഷ്യൽ ഗോളുകൾ നേടിയതിനു ശേഷം മാത്രമായിരിക്കും ക്രിസ്റ്റ്യാനോ റൊണാൾഡോ ഫുട്ബോളിൽ നിന്നും വിരമിക്കൽ പ്രഖ്യാപിക്കുക.